‘बर्फी’, ‘रेड’, ‘रुस्तम’ यांसारख्या चित्रपटांमध्ये भूमिका साकारणारी अभिनेत्री इलियाना डिक्रूझ गेल्या काही दिवसांपासून तिच्या खासगी आयुष्यामुळे चर्चेत आहे. नुकतंच तिने ट्विटरच्या माध्यमातून चाहत्यांची संवाद साधला आणि त्यादरम्यान तिने स्वत:बद्दल खुलासासुद्धा केला. मला झोपेत चालण्याची सवय आहे, असं इलियानाने ट्विट करत सांगितलं.

”आता मी या गोष्टीला पूर्णपणे स्वीकारले आहे की मला झोपेत चालण्याची सवय आहे. सकाळी उठल्यावर माझ्या पायाला सूज असते किंवा एखादी छोटी जखम तरी असते. यामागचं कारण हेच असावं,” असं तिने लिहिलं. इलियानाच्या या ट्विटवर चाहत्यांनी तिला बरेच उपाय सांगितले, काहींनी सल्ले दिले. तुझ्या बेडरुममध्ये कॅमेरा लावून ठेव, त्यामुळे तुला झोपेत चालण्याच्या सवयीबद्दल स्पष्टपणे समजेल, असा सल्ला एकाने दिला. तर दुसऱ्याने तिला डॉक्टरकडे जाऊन उपचार घेण्यास सांगितले.

सोशल मीडियावर इलियानाचे फॉलोअर्स बरेच आहेत आणि या माध्यमातून इलियानासुद्धा तिच्या आयुष्यातील बऱ्याच गोष्टी सांगताना दिसते. नुकतंच तिचं ऑस्ट्रेलियन प्रियकर अँड्र्यू नीबोन याच्याशी ब्रेकअप झाल्याची चर्चा होती. या दोघांनी सोशल मीडियावर एकमेकांना अनफॉलो केल्यानंतर या चर्चेला सुरुवात झाली. इलियानाने तिच्या इन्स्टाग्रामवरून अँड्र्यूसोबतचे फोटो डिलीट केले. हे दोघं लिव्ह इन रिलेशनशिपमध्ये राहत होते.