बॉलिवूडची अभिनेत्री शिल्पा शेट्टीची बहीण शमिता शेट्टीच्या गाडीला अपघात झाला आहे. तीन अज्ञात व्यक्तींनी शमिताच्या गाडीला मोटारसायकलने धडक दिली. या अपघातातून शमिता बचावली असून तिच्या ड्रायव्हरला मारहाण करण्यात आली आहे.

ठाण्यातील व्हिवियाना मॉलजवळ हा अपघात झाला आहे. याप्रकरणी शमिताने राबोडी पोलीस ठाण्यात तक्रार दाखल केली आहे. शमिताच्या तक्रारीनंतर पोलिसांनी दखल घेत तीन अज्ञातांविरोधात गुन्हा दाखल केला आहे. त्याप्रमाणेच पुढील तपास सुरु झाला आहे.

दरम्यान, शमिताने ‘मोहब्बते’ सारख्या सुपरहिट चित्रपटातून बॉलिवूडमध्ये पदार्पण केलं. मात्र शमिताच्या या चित्रपटानंतर ती फार कमी चित्रपटांमध्ये झळकली. चित्रपटांनंतर शमिताने तिचा मोर्चा वेब सीरिजकडे वळविला होता. ‘यो के हुआ ब्रो’ या वेब सीरिजमध्ये ती झळकली होती. त्यानंतर ‘खतरों के खिलाडी’च्या ९ व्या पर्वातही तिने सहभाग घेतला होता.