प्रेक्षकांना पुन्हा एकदा खळखळून हसवण्यासाठी 'धमाल' फ्रँचाइजीमधील तिसरा चित्रपट 'टोटल धमाल' सज्ज झाला आहे. या चित्रपटाचा पहिला पोस्टर नुकताच प्रदर्शित झाला आहे. माधुरी दीक्षित, अजय देवगण, अनिल कपूर, अर्शद वारसी, रितेश देशमुख, जावेद जाफ्री, जॉनी लिव्हर अशी मोठी स्टारकास्ट या पोस्टरमध्ये पाहायला मिळत आहे. यापैकी बरेच कलाकार हे 'धमाल' आणि 'डबल धमाल' या चित्रपटांमध्ये होते. 'टोटल धमाल'मध्ये अनिल कपूर आणि माधुरी यांची भर पडली आहे. 'टोटल धमाल'मुळे तब्बल १७ वर्षानंतर माधुरी आणि अनिलची जोडी पुन्हा एकदा रुपेरी पडद्यावर झळकणार आहे. या जोडीने 'बेटा', 'राम लखन', 'परिंदा' या हिट चित्रपटांमध्ये एकत्र काम केले आहे. अजय देवगण 'टोटल धमाल' चित्रपटाची सहनिर्मिती करत आहे. वाचा : त्या चर्चा निव्वळ अफवा; 'सूर्यवंशी'बद्दल रोहित शेट्टीचा नवा खुलासा येत्या २१ जानेवारीला या चित्रपटाचा ट्रेलर प्रदर्शित होणार आहे. 'धमाल' आणि 'डबल धमाल' या दोन्ही चित्रपटांनी प्रेक्षकांचं भरभरून मनोरंजन केलं. त्यामुळे आता 'टोटल धमाल'बद्दलही प्रेक्षकांमध्ये फार उत्सुकता आहे. इंद्र कुमार दिग्दर्शित हा चित्रपट २२ फेब्रुवारी रोजी प्रदर्शित होणार आहे.
