लॉकडाउनच्या काळात ‘ऑन ड्युटी’ असणाऱ्या पोलिसांनी २१ दिवसात काय केलं असतं, यासंदर्भातील आपल्या इच्छा व्यक्त करणारं एक ट्विट केलं होतं. या व्हिडिओवर बॉलिवूडमधील अनेक कलाकार फिदा झाले. अनेकांनी ट्विट करुन मुंबई पोलिसच खरे सुपर हिरो असल्याचं सांगत त्यांच्यावर कौतुकाचा वर्षाव केला. असंच एक कौतुक करणारं ट्विट अभिनेत्री उर्वशी रौतेलाने देखील केलं होतं. मात्र या ट्विटमुळे आता ती अडचणीत सापडली आहे. नेटकऱ्यांनी तिच्यावर चक्क ट्विट चोरीचा आरोप केला आहे.

अभिनेता सिद्धार्थ मल्होत्रा याने एक ट्विट केलं होतं. या ट्विटची हुबेहुब नक्कल उर्वशीने केली आहे. त्यामुळे नेटकरी तिला या दोन ट्विटमधील फरक विचारत आहेत. या ट्विटमुळे तिला नेटकऱ्यांनी ट्रोल करण्यास सुरुवात केली आहे.

खरं तर यापूर्वी ही अनेकदा तिच्यावर ट्विट चोरीचे आरोप लावण्यात आले आहेत. अभिनेत्री शबाना आझमी यांचा अपघात झाला होता. तेव्हा त्यांना धीर देण्यासाठी पंतप्रधान नरेंद्र मोदी यांनी एक ट्विट केलं होतं. हे ट्विट उर्वशीने जसंच्या तसं कॉपी केलं होतं. यापूर्वी प्रसिद्ध मॉडेल गिगी हादिद हिने केलेली एक इन्स्टा पोस्ट देखील तिने जशीच्या तशी स्वत:च्या अकाऊंटवर कॉपी पेस्ट केली होती. त्यामुळे स्पष्टीकरण दिल्यावरही नेटकऱ्यांनी तिची खिल्ली उडवण्याचे अद्याप थांबवलेले नाही.