सेलिब्रिटींचे फोटो काढण्यासाठी चाहत्यांसोबतच फोटोग्राफर्सचीही धडपड सुरू असते. या धडपडीचा फटका एका फोटोग्राफरला बसला. अभिनेता वरुण धवन त्याची गर्लफ्रेंड नताशा दलाल हिच्यासोबत गाडीमधून येत होता. त्यावेळी त्याचे फोटो काढण्यासाठी गाडीसमोर फोटोग्राफर्सची गर्दी जमली होती. या गर्दीत वरुणच्या गाडीखाली एका फोटोग्राफरचा पाय आला. हा व्हिडीओ सध्या सोशल मीडियावर व्हायरल होत आहे. गाडी पायावरून जात असतानाच फोटोग्राफरचा आवाज ऐकून वरुणने लगेचच ड्रायव्हरला गाडी थांबवण्यास सांगितलं. यानंतर वरुण त्या फोटोग्राफर्सवर चिडताना या व्हिडीओमध्ये दिसत आहे. "मी प्रत्येकवेळी तुम्हाला माझे फोटो काढू देतो. तरीसुद्धा इतकी धडपड करण्याची काय गरज आहे", असं तो त्या फोटोग्राफर्सना म्हणताना दिसतोय. त्यानंतर तो फोटोसाठी पोझसुद्धा देतो आणि पोझ देताना त्या फोटोग्राफरचा पाय ठीक आहे का याची विचारपूस करताना दिसत आहे. वरुणच्या चित्रपटांबद्दल बोलायचे झाल्यास, तो लवकरच 'कुली नंबर १' या चित्रपटाच्या रिमेकमध्ये झळकणार आहे. यामध्ये त्याच्यासोबत सारा अली खानची मुख्य भूमिका आहे. या चित्रपटाचे दिग्दर्शन वरुणचे वडील डेविड धवन करत आहेत.
