अॅण्ड द मिस युनिव्हर्स इज मिस कोलंबिया.. सॉरी मिस फिलिपिन्स. तुम्हीही गडबडलात ना. नक्की मिस युनिव्हर्स झाली तरी कोण? यंदाचा विश्वसुंदरीचा किताब मिस फिलिपिन्सने पटकाविला आहे. मात्र, काही वेळासाठी विश्वसुंदरीचा मुकुट मिस कोलंबियाच्या डोक्यावर झळकला होता. पण काही क्षणात सूत्रसंचालकाच्या चुकीमुळे विश्वसुंदरी स्पर्धेच्या निकालाला नाट्यमय स्वरुप आले. झाले असे की, सूत्रसंचालकाने नावाचा घोळ घातल्याने काही क्षणासाठी का होईना मिस कोलंबिया अरिअदना गुटिरर्ज अरेविलो हिला मिस युनिव्हर्स झाल्याचा मान मिळाला. सर्वांकडून तिचे कौतुकही करण्यात आले. मात्र, काही क्षणांतच तिचा हा संपूर्ण आनंद विरला. कारण, सूत्रसंचालकाने अचानक सर्वांची माफी मागितली. कोणाला काही कळलेच नाही की सूत्रसंचालक स्टीव्ह हार्वे हा माफी का मागत आहे. त्यानंतर त्याने विश्वसुंदरीच्या किताबासाठी मिस फिलिपिन्सच्या नावाची घोषणा केली. या सर्व नाट्यमय कार्यक्रमात मिस कोलंबियाला तर दुःख झालेच पण खरी विश्व सुंदरी झालेल्या मिस फिलिपिन्सलाही तिचा आनंद व्यवस्थित व्यक्त करता आला नाही. आपल्या या चुकीसाठी सूत्रसंचालक स्टीव्हने दिलगिरी व्यक्त करत म्हटले की, मी योग्य नाव वाचले नाही ही संपूर्णपणे माझी चुकी आहे. पिया अलोंजो ही यंदाची विजेती असून अरिअदना ही उपविजेती आहे. मिस युनिव्हर्सच्या किताबासाठी ८० देशांतील १९ ते २७ वयोगटातील सुंदरीनी सहभाग घेतला होता.
