अभिनेता राजकुमार राव आणि नुशरत भरुचा यांचा ‘छलांग’ हा चित्रपट लवकरच प्रेक्षकांच्या भेटीला येणार आहे. त्यापूर्वी या चित्रपटातील ‘दिदार दे’ हे गाणं प्रेक्षकांच्या भेटीला आलं आहे. हे गाणं रिमिक्स असून प्रेक्षकांना ते फारसं भावल्याचं दिसून येत नाही. विशेष म्हणजे या रिमिक्स गाण्यावर विशाल आणि शेखर यांनी त्यांचं मत व्यक्त केलं आहे.

“आम्ही २००४ मध्ये हे मूळ गाणं तयार केलं होतं. त्यामुळे या रिमिक्सच्या वेळी आम्हाला क्रेडिट देण्यात आलं आहे. पण आम्ही हे रिमिक्स तयार केलेलं नाही. चित्रपटाच्या टीमसाठी आणि चित्रपटासाठी आमच्या मनापासून शुभेच्छा. तसंच इतके वर्ष आमच्या गाण्यावर प्रेम केल्यामुळे सगळ्याचे आभार”, असं ट्विट विशालने केलं आहे.


त्याच्या ट्विटवर अनेकांनी प्रश्न विचारले आहेत. यात ‘९० च्या दशकातील गाण्यांचं रिमिक्स केल्यास त्याला बॉयकॉट करावं का?’ असा प्रश्न एका नेटकऱ्याने विचारलं. विशेष म्हणजे ‘नक्कीच करु शकता’, असा रिप्लाय विशालने दिला आहे.

दरम्यान, ‘दिदार दे’ हे मूळ गाणं संगीतकार विशाल-शेखर आणि सुनिधी चौहान यांनी गायलं आहे. तर याचं रिमिक्स गाणं असीस कौर आणि देव नेगी यांनी गायलं आहे. अॅमेझॉन प्राइम व्हिडिओवर १३ नोव्हेंबर रोजी हा चित्रपट प्रदर्शित होणार आहे. या चित्रपटाचं दिग्दर्शन हंसल मेहता यांनी केलं आहे. तर निर्मिती अजय देवगण, लव रंजन आणि अंकुर गर्ग यांनी केली आहे.