करोनाची प्रादुर्भाव उद्भवल्यापासून अनेक कलाकार मदतीसाठी पुढे सरसावले. काहींनी डॉक्टर्सना, नर्सेसना काहींना पोलिसांनी, काहींनी स्थलांतरित मजुरांना तर काहींनी गोरगरीबांना जमेल तशी मदत केली. अशातच एका नवोदित कलाकाराने केलेल्या मदतीचं कौतुक होत आहे. अभिनेता वृषभ शहा याने त्याच्या करिअरच्या पहिल्यावहिल्या चित्रपटाच्या साइनिंगची रक्कम मदतीसाठी दिली. वृषभ लवकरच 'शारदा प्रॉडक्शन' निर्मित 'मंगलाष्टक रिटर्न' या चित्रपटात मुख्य भूमिकेत झळकणार आहे. साइन केलेल्या या चित्रपटाच्या रकमेतून त्याने स्वतःसाठी काहीही खर्च न करता पोलीस बांधवांना मदत केली आहे. त्यामुळे मोठ्या पडद्यावर झळकण्याआधीच त्याची चर्चा होत आहे. याबद्दल वृषभ म्हणाला, "करोनाचा प्रादुर्भाव दिवसेंदिवस वाढताना दिसतोय. स्वत:चा जीव धोक्यात घालून पोलीस बांधव सर्वांचं रक्षण करत आहेत. त्यांचं काम ते काटेकोरपणे बजावत आहेत. या मदतकार्यात एक खारीचा वाटा म्हणून मी माझ्या 'मंगलाष्टक रिटर्न' चित्रपटाच्या साइन केलेल्या रकमेतून ही मदत केली आहे."
