‘स्टार प्लस’ वाहिनीवरील ‘ये रिश्ता क्या कहलाता है’ या मालिकेतील ‘अक्षरा’ तुम्हाला माहितच असेल. मालिकेत हिनाने साकारलेली आदर्श सूनेची भूमिका प्रेक्षकांना खूप आवडली. छोट्या पडद्यावर प्रचंड गाजलेल्या या मालिकेतून अभिनेत्री हिना खान घराघरात पोहोचली. हिनाचे अभिनय कौशल्य तर सर्वांना ठाऊकच आहे, मात्र फार कमी लोकांना हे माहित आहे की ती एक चांगली गायिकाही आहे. स्वातंत्रदिनाच्या निमित्ताने हिनाने तिच्या आवाजातील 'वंदे मातरम्' राष्ट्रीय गीताचा एक व्हिडिओ पोस्ट केला. हिनाने तिच्या इन्स्टाग्राम अकाऊंटवर हा व्हिडिओ शेअर केलाय. या व्हिडिओला सोशल मीडियावर अनेकांकडून लाइक्स मिळत असून ९६ हजारहूनही जास्त व्ह्यूज मिळाले आहेत. या व्हिडिओच्या कॅप्शनमध्ये तिने लिहिले की, 'तुम्हा सर्वांना स्वातंत्रदिनाच्या खूप शुभेच्छा. फार कमी वेळात हे गीत रेकॉर्ड केलंय. तुम्हा सर्वांना आवडेल अशी अपेक्षा आहे.' मालिका सोडल्यानंतर हिना पाच महिन्यांच्या ब्रेकनंतर सध्या ‘खतरों के खिलाडी’ या रिअॅलिटी शोमध्ये स्टंट्स करताना दिसतेय. या शोमध्ये टास्कदरम्यान तिने 'लग जा गले' हे गाणं गायलं होतं. तिने गायलेलं हे गाणं शोचा सूत्रसंचालक रोहित शेट्टीलाही खूप आवडलं होतं. त्यानंतर अनेकदा रोहितने शोमध्ये तिला ते गाणं गायला सांगितलं.
