मध्यप्रदेशात सध्या अनधिकृत बांधकामांवर कारवाई केली जात आहे. या कारवाई दरम्यान पोलिसांनी एका बाईला व तिच्या लहान मुलाला मारहाण केली. या मारहाणीचा व्हिडीओ सध्या सोशल मीडियावर जोरदार व्हायरल होत आहे. या पोलिसांवर अभिनेता जीशान अय्यूब याने संताप व्यक्त केला आहे. “आता आपल्याकडे लाज देखील उरलेली नाही” असं म्हणत त्याने या प्रकरणावर प्रतिक्रिया दिली आहे.

अवश्य पाहा – बहिणीला वाचवताना त्याला ९० टाके पडले; सुपरहिरोंनीही केला ६ वर्षांच्या हिरोला सलाम

जीशानने मध्यप्रदेशातील त्या घटनेचा व्हिडीओ ट्विट केला आहे. या व्हिडीओवर त्याने “अभिनंदन! अखेर आपण आपल्या देशाला सुपरपावर बनवले. लाज वाटत नाही का असंही आता विचारणार नाही. कारण आता ते देखील विचारावसं वाटत नाही.” अशा आशयाची कॉमेंट केली आहे. त्याचे हे ट्विट सध्या सोशल मीडियावर सर्वांचेच लक्ष वेधून घेत आहे. काही तासांत शेकडो नेटकऱ्यांनी यावर आपल्या प्रतिक्रिया दिल्या आहेत.

अवश्य पाहा – “केलेल्या पापांची याच जन्मात फळं भोगावी लागतील”; अभिनेत्याने केली सलमानवर टीका

जीशान अय्यूब बॉलिवूडमधील एक नामांकित अभिनेता आहे. २०११ साली ‘नो वन किल्ड जेसिका’ या चित्रपटातून त्याने बॉलिवूडमध्ये पदार्पण केले होते. त्यानंतर ‘तन्नू वेड्स मन्नू’, ‘जन्नत २’, ‘ठग्स ऑफ हिंदूस्तान’, ‘मनिकर्णिका’, ‘झिरो’ यांसारख्या अनेक चित्रपटांमध्ये तो झळकला आहे. जीशान अभिनयासोबतच सोशल मीडियावरील पोस्टमुळेही चर्चेत असतो. या पार्श्वभूमीवर त्याचे हे ट्विट सध्या चर्चेत आहे.