“…म्हणून रोहित शेट्टी यांच्या सिनेमाला नकार दिला”, अजय पुरकर यांनी स्वत:च केलेला खुलासा; काय होतं नेमकं कारण?

अजय पुरकर यांनी आजवर अनेक मराठी नाटक, मालिका व चित्रपटांमधून प्रेक्षकांचे मनोरंजन केले आहे. त्यांच्या सकारात्मक अन् नकारात्मक अशा प्रत्येक भूमिकेला प्रेक्षकांनी पसंती दिली आहे. मराठी कलाविश्वात आपल्या अभिनयाची छाप पाडणाऱ्या अजय पुरकर यांना हिंदीतूनही ऑफर आल्या होत्या; पण त्यांनी त्या नाकारल्या.

बॉलीवूडचा प्रसिद्ध दिग्दर्शक रोहित शेट्टी यांनी त्यांच्या सिनेमासाठी अजय पुरकर यांना विचारलं होतं; पण अजय यांनी तेव्हा त्या भूमिकेला नकार दिला होता. त्याबद्दल स्वत: अजय पुरकर यांनीच एका मुलाखतीत खुलासा केला होता.

‘राजश्री मराठी’ला दिलेल्या मुलाखतीत अजय पुरकर म्हणाले होते, “ ‘असंभव’सारखी मालिका मी २००७, २००८ व २००९ अशी तीन वर्षे केली. त्यासाठी मला पुरस्कारदेखील मिळाले. नंतर मला लक्षात आलं की, एखादी भूमिका जरा चांगली केली, तर त्याचा त्रासही होतो. कारण- त्यानंतर मला अनेक इन्स्पेक्टरच्या भूमिका ऑफर व्हायला लागल्या. ‘असंभव’मधील भूमिकेनंतर मला इन्स्पेक्टरच्या भूमिकेबद्दल विचारणा झाली आणि त्यानंतर मी त्यांना नकार दिला. देवानं मला ती ताकद दिली आहे की, मी भूमिकेसाठी नाही म्हणू शकतो. ‘असंभव’ या मालिकेनं मला एक ओळख दिली. त्याआधी दोन-चार मालिका केल्या होत्या; पण त्यात दोनेक एपिसोडपुरतं काम होतं. पण तुमच्या संघर्षाच्या काळात ते करावंच लागतं. त्यात काहीही चूक नाही.”

“मी अनेक कामांना नाही म्हटलंय. रोहित शेट्टी यांच्याकडूनही फोन आला होता. रोहितसरांनीच नाव सुचवलं होतं. वाईमध्ये शूट असल्याचं वगैरे सांगण्यात आलं. माझे दोन सीन्स होते; पण मी त्यांना नाही म्हटलं. ते राकेश मारिया यांच्यावर आधारित सिनेमा करतायत आणि जॉन अब्राहम त्यात मुख्य भूमिकेत आहे. मी सांगितलं की, रोहितसरांना धन्यवाद सांगा. दोन सीन नाही करणार. असे अनेक लोक आहेत, जे हे करतात. मी हे नाही म्हणणार की, हे वाईट आहे. कारण- प्रत्येक जण कशाला प्राधान्य देईल, हे आपण ठरवू शकत नाही; पण मी नाही म्हणू शकतो”, असंही ते पुढे म्हणाले होते.

शेवटी ते म्हणाले होते, “अशीच दोन सीन्सची भूमिका मी ’83’ सिनेमातही सोडली होती. तेव्हाही मी नाही म्हटलं होतं. हा खूप कठीण निर्णय असतो; पण हा निर्णय मी तेव्हाच घेऊ शकलो, जेव्हा एका मालिकेनं मला नाव आणि लोकप्रियता मिळवून दिली. माझ्यात तो आत्मविश्वास आहे की, मी एखाद्या भूमिकेला नाही म्हणू शकतो. एखाद्या भूमिकेला मी नाही म्हणतो, तसेच एखादी गोष्ट पटली, तर मी त्यासाठी होसुद्धा म्हणतो.”