Asha Bhosle : ‘माझं वय झालंय, थोडेच दिवस राहिलेत’ आशा भोसले असं का म्हणाल्या होत्या? काय होतं ते वक्तव्य?

२८ जून २०२४ ला काय म्हणाल्या होत्या आशा भोसले?

मुंबईतल्या विलेपार्ले या ठिकाणी असलेल्या दीनानाथ मंगेशकर नाट्यगृहात आशा भोसले यांच्यावरील पुस्तकाचं प्रकाशन करण्यात आलं होतं. त्या कार्यक्रमात त्या भावूक झाल्या होत्या. आशा भोसले म्हणाल्या होत्या, “मित्र आणि मैत्रिणींनो माझा नमस्कार. उपस्थित सर्व थोरांना माझा प्रणाम. आज जे पुस्तक प्रकाशन झालं त्याची मला कल्पना नव्हती. प्रसाद महाडकर, अमेय हेटे, आशिष शेलार यांच्यासह सगळ्यांनी मेहनत घेऊन हे पुस्तक प्रकाशित केलं. गौतम राजाध्यक्ष आणि यशवंत देव यांना पुस्तक अर्पण केलं आहे. आज जे फोटो पाहात आहात तशी मी दिसत नाही. गौतम राजाध्यक्षांच्या कॅमेराने फोटो काढल्यावर कुणीही सुंदरच दिसायचं.”

माझं वय झालं आहे, आता थोडेच दिवस राहिलेत-आशा भोसले

“माईक समोर आला की घसा कोरडा पडतो. ६० वर्षांची असताना मी साडे अकरा हजार गाणी गायली होती. जगात सगळ्यात जास्त रेकॉर्ड माझा आवाज आहे असं म्हणतात. याची नोंद गिनिज बुकानेही घेतली आहे. मी यासाठी मी माझ्या सर्व सहकाऱ्यांना प्रणाम करते. रेकॉर्डिस्ट नसते तर माझा आवाज तुमच्यापर्यंत पोहचलाच नसता.” असंही आशा भोसले यांनी म्हटलंय. “माझ्या आयुष्यात कधी असं पुस्तक प्रकाशित होईल याची कल्पना नव्हती. माझं आता वय झालं आहे. फार थोडे दिवस राहिले आहेत. असंच प्रेम देत राहा” असं आशा भोसले तेव्हा म्हणाल्या होत्या.

सांगली या ठिकाणी जन्म, मुंबईत निधन

सांगली या ठिकाणी आशा भोसले यांचा जन्म झाला होता. वयाच्या १० व्या वर्षापासून त्यांनी गायनाला सुरुवात केली होती. गिनीज बुकनेही सर्वाधिक गाणी गाणारी गायिका अशी त्यांची नोंद झाली आहे. आपल्या वेगळ्या आवाजाची भुरळ सगळ्या जगाला पडली होती. त्या जरी आपल्याला सोडून गेल्या असल्या तरीही त्यांचं गाणं कायमच आपल्या सोबत राहणार आहे. तो आवाज कायमच आपल्याला साथ देईल यात शंका नाही.