बिग बॉस १५ मध्ये नव्या वर्षाचं स्वागत मोठ्या उत्साहात केलं जाणार आहे. ३१ डिसेंबरला या शोचा एक स्पेशल एपिसोड प्रसारित होत आहे. ज्यात अनेक बॉलिवूड सेलिब्रेटी हजेरी लावताना दिसणार आहेत. या आठवड्यात 'विकेंड का वार' शुक्रवारी होणार आहे. नुकताच या एपिसोडचा प्रोमो प्रदर्शित झाला आहे. या व्हिडीओमध्ये सलमान खान घरातील सदस्यांना विशेषतः अभिनेत्री शमिता शेट्टीला ओरडताना दिसत आहे. येत्या एपिसोडमध्ये घरातील सदस्य नव्या वर्षाचं जल्लोषात स्वागत करताना दिसणार आहेत. यासोबतच सलमान खानचा अँग्रीमॅन अवतारही पाहायला मिळणार आहे. घरातील सदस्यांचं वागणं आणि टास्क रद्द करण्यावरून सलमान खान रागावताना दिसणार आहे. सोशल मीडियावर व्हायरल झालेल्या प्रोमो व्हिडीओमध्ये सलमान खान अभिनेत्री शमिता शेट्टी आणि अभिजित बिचुकले यांच्यावर रागावताना दिसत आहे. शमिताचं बोलणं ऐकून तर तो तिच्यावर जोरात ओरडतानाही दिसत आहे. सलमान खान घरातील सदस्यांना सातत्यानं टास्क रद्द करण्यावरून सुनावताना दिसत आहे. तो म्हणतो, 'टास्क रद्द करण्यामध्ये तर तुम्ही सर्वांनी पीएचडी केली आहे. टास्क जर संचालक रद्द करत असेल तर ते पूर्णपणे चुकीचं आहे. पण जर तो सदस्यांनी रद्द केला तर ते बरोबर आहे.' याशिवाय तो शमितानं राखीसोबत केलेल्या वर्तनासाठी तिला ओरडताना दिसतो. शमिताचं वागणं चुकीचं असल्याचंही तो सांगतो. सलमानचं बोलणं ऐकल्यावर शमिताला राग येतो आणि ती रागात ओरडून बोलते, 'माझं दुसऱ्या कोणाशीही असं वागणं नाहीये. तुम्हाला वाटतंय की माझं तिच्याशी असलेलं वागणं चुकीचं आहे तर मला नाही माहीत. शमिताचं बोलणं ऐकल्यावर सलमानलाही राग अनावर होतो आणि तो तिला जोरात ओरडतो. यानंतर शमिता रडू लागते आणि तिथून उठून निघून जाते. दरम्यान मागच्या आठवड्यातही शमिताला सलमान याच कारणावरून सुनावलं होतं.
