अरिजीत सिंगने जाहीर केली निवृत्ती, पार्श्वगायन करणार नाही; पोस्ट करत म्हणाला….

अरिजीत सिंगने आज, मंगळवारी (२७ जानेवारी २०२६) त्याच्या सोशल मीडिया अकाउंट्सवरून पोस्ट करून निवृत्ती जाहीर केली. अरिजीत सिंग अवघ्या ३८ वर्षांचा आहे. त्याने अचानक निवृत्ती जाहीर केल्याने चाहत्यांना धक्का बसला आहे. अचानक अरिजीत सिंगने एवढा मोठा निर्णय का घेतला? असा प्रश्न सर्वांना पडला आहे.

“हॅलो, सर्वांना नवीन वर्षाच्या शुभेच्छा. इतकी वर्षे श्रोते म्हणून तुम्ही मला दिलेल्या प्रेमासाठी धन्यवाद. मी आनंदाने जाहीर करतोय की यापुढे पार्श्वगायक म्हणून मी कोणतेही नवीन काम घेणार नाही. मी निवृत्ती घेतोय. हा प्रवास खूप सुंदर होता,” असं अरिजीत सिंगने पोस्टमध्ये लिहिलं आहे.

पाहा अरिजीत सिंगची पोस्ट

अरिजीत सिंग पोस्टवर चाहत्यांच्या कमेंट्सचा पूर आला आहे. चाहते त्याला निवृत्ती घेण्यामागचं कारण विचारत आहेत. करिअरमध्ये यशाच्या शिखरावर असताना अचानक अरिजीतने इतका मोठा निर्णय घेतल्याने चाहते धक्क्यात आहेत.

अरिजीत सिंगने पार्श्वगायनातून निवृत्ती घेतली असेल, पण त्याने संगीत क्षेत्रापासून स्वतःला दूर केलेलं नाही. पार्श्वगायन करण्याव्यतिरिक्त, अरिजीत कॉन्सर्टमधूनही बरीच कमाई करतो. तो दोन तासांच्या कॉन्सर्टसाठी अंदाजे १४ कोटी रुपये मानधन घेतो. पार्श्वगायनातून निवृत्ती घेतल्यानंतर तो पूर्णपणे कॉनर्टवर लक्ष केंद्रित करेल अशी शक्यता आहे.