बॉबी देओलचा तब्बल १९ वर्षांनी खुलासा, ‘या’ सुपरहिट चित्रपटात त्याच्याऐवजी शाहीद कपूरला घेतलं अन्…; म्हणाला, “खूप…”

बॉबी देओल हा अनेकदा त्याच्या मुलाखतींमध्ये त्याच्या करिअरमध्ये आलेले चढ-उतार आणि संघर्षमय काळ यावर बोलत असतो. ‘आप की अदालत’मध्ये अभिनेता बॉबी देओल सहभागी झाला होता. यावेळी त्याने वारंवार फ्लॉप मुव्ही झाल्यानंतर आलेल्या रागाचे आणि द्वेषाचे रुपांतर हे स्वतःला घडवण्यामध्ये केल्याचे सांगितले. यावेळी बॉबीने त्याला न मिळालेल्या एका चित्रपटाचा उल्लेख केला. बॉबी देओलने सांगितले की, बॉलीवूडमध्ये संघर्षाचा काळ सुरू असताना असा एक प्रसंग आला ज्यामुळे मन खूप दुखावले आणि पूर्णपणे तुटले. ते म्हणजे इम्तियाजच्या २००७ साली रिलीज झालेल्या ‘जब वी मेट’ या रोमँटिक चित्रपटातून एकीकडे बॉबीला काढून शाहिद कपूरला घेण्यात आले; यामुळे मोठा धक्का बसला असल्याचे बॉबी देओलने सांगितले आहे.

बॉबी देओलला बाजूला करीत शाहिद कपूरला लीड रोल

इम्तियाज ‘जब वी मेट’ चित्रपटाचे लेखन करत असताना बॉबी देओलने त्याला चित्रपटासाठी निर्माते मिळवून देण्यासाठी मदत केली. तसेच मुख्य अभिनेत्री म्हणून काम करण्यासाठी करीना कपूरशी देखील बोलणे केले. मात्र यानंतर बॉबी देओलला बाजूला करीत शाहिद कपूरला लीड रोल देण्यात आला. याचे वाईट वाटले असल्याचे बॉबी देओलने सांगितले.

बॉबी म्हणाला की, आता या गोष्टी जुन्या झाल्या, पण तेव्हा इम्तियाजचे काम खूप आवडत होते आणि आम्ही एकत्र काम करण्याचे ठरवले होते. त्यावेळी मला माझ्या करिअरमध्ये अशा कथानकाची अन् चित्रपटाची गरज होती. मात्र, जेव्हा आपला वाईट काळ सुरू असतो तेव्हा आपल्याला कोणी साथ देत नाही, अशी खंत बॉबी देओलने बोलून दाखवली.

परिस्थिती मान्य केली अन् स्वतःवर काम केले – बॉबी

पुढे तो म्हणाला की, चित्रपटाच्या कथा लेखनामध्ये खूप काळ निघून गेला आणि नंतर ज्या निर्मात्यांना मी इम्तियाजसह काम करण्याचे सुचवले, त्यांनी मला न घेता चित्रपटाचे शूटिंग सुरू केले. अभिनेत्री आणि कथानक तेच होते; फक्त हिरो बदलण्यात आला होता. पण, अशा गोष्टी घडत असतात. नेहमी आपल्याबरोबर चांगलेच घडेल असे नसते, असे बॉबी देओलने सांगितले.

अशा प्रसंगातून चांगला व्यक्ती घडलो

पुढे बॉबी म्हणाला की, त्यावेळी मी परिस्थिती मान्य केली आणि स्वतःवर काम करण्यास सुरुवात केली. यावेळी झालेला त्रास आणि रागाला मी माझी ताकद बनवले. कारण, आपण वाईट परिस्थितीवर रडत नाही बसू शकत. या अशा प्रसंगातून मला खूप काही शिकता आहे. मी अधिक सक्षम अभिनेता आणि चांगला व्यक्ती म्हणून घडलो. अशा घटनांमधून शिकत गेलो आणि आता मला कोणाविषयी काहीही तक्रार नाही, असे देखील अभिनेता बॉबी देओल म्हटला आहे.