सलीम खान यांच्या प्रकृतीबद्दल मोठी अपडेट समोर, स्वत: अरबाज खानने दिली ‘ही’ माहिती; कशी आहे प्रकृती?

सलीम खान यांच्या प्रकृतीबद्दलची बातमी समोर येताच त्यांच्या चाहत्यांनी काळजी व्यक्त केली होती. अनेक कलाकारांनीसुद्धा रुग्णालयात जात त्यांची भेट घेतली होती. काही दिवसांपूर्वी जावेद अख्तर यांनी सलीम यांच्या प्रकृतीबद्दलची अपडेट शेअर केली होती. त्यांच्या प्रकृतीत आधीपेक्षा खूप सुधारणा आहे आणि ते हळूहळू बरे होत आहेत असं जावेद अख्तर यांनी म्हटले होते.

सलीम खान यांच्या प्रकृतीबद्दल अरबाज खान म्हणाला…

अशातच आता सलीम खान यांचा मुलगा अरबाज खानने त्यांच्या प्रकृतीबद्दल माहिती दिली आहे. बुधवारी रात्री मुंबईत एका इफ्तार पार्टीतून बाहेर पडताना अरबाजने माध्यमांशी संवाद साधला. यावेळी वडिलांच्या प्रकृतीबद्दल विचारले असता तो म्हणाला, “त्यांची प्रकृती आता आधीपेक्षा चांगली आहे आणि त्यात सुधारणा होत आहे.” नंतर त्यांना घरी कधी सोडणार आहेत, या प्रश्नावर त्याने “लवकरच” असे उत्तर दिले.

सलीम खान रुग्णालयात दाखल झाल्यापासून खान कुटुंबातील कोणत्याही सदस्याने सलीम यांच्या प्रकृतीबद्दल अधिकृत माहिती दिली नव्हती. अशातच अरबाज खानने दिलेली ही माहिती कुटुंबाचे पहिले अधिकृत विधान आहे. यापूर्वी आमिर खान, चित्रांगदा सिंह आणि डेझी शाह यांसारख्या सिनेसृष्टीतील कलाकारांनी सलीम खान यांची भेट घेऊन त्यांची प्रकृती स्थिर असल्याचे सांगितले होते.

दरम्यान, १७ फेब्रुवारी रोजी सलीम खान यांना मुंबईतील लीलावती रुग्णालयात दाखल करण्यात आलं. त्यांच्यावर DSA (Digital Subtraction Angiography ची शस्त्रक्रिया झाली. त्यानंतर त्यांची प्रकृती स्थिर असल्याचे सांगण्यात आले. सध्या ते रुग्णालयात डॉक्टरांच्या देखरेखीखाली आहेत.

सलीम खान हे बॉलीवूडमधील एक प्रसिद्ध पटकथा लेखक आहेत. त्यांनी जावेद अख्तर यांच्याबरोबर अनेक ब्लॉकबस्टर चित्रपटांसाठीचं लेखन केले आहे. सलीम खान यांनी जावेद अख्तर यांच्यासह अनेक चित्रपटांचं लेखन केलं. ‘जंजीर’, ‘डॉन’, ‘शोले’, ‘मिस्टर इंडिया’, ‘हाथी मेरे साथी’, ‘सीता और गीता’, ‘यादों की बारात’सारख्या सिनेमांचं त्यांनी लेखन केलं आहे.