“त्याने मला चुकीच्या पद्धतीने…”, बॉलीवूड अभिनेत्रीबरोबर दिग्दर्शकाने केलेले गैरवर्तन; म्हणाली, “आम्ही ६-७ मुली…”

अशातच बॉलीवूडच्या अभिनेत्रीनेही तिच्याबरोबरचा एक वाईट प्रसंग शेअर केला आहे. ही अभिनेत्री म्हणजे डेझी शाह. दाक्षिणात्य मनोरंजन सृष्टीतल्या एका दिग्दर्शकाने कास्टिंगच्या बहाण्याने तिच्याशी गैरवर्तन केल्याचे तिने सांगितले. ‘द फ्री प्रेस जर्नल’ला दिलेल्या मुलाखतीत डेझीने तिच्याबरोबरचा प्रसंग सांगितला.

डेझीने खुलासा केला की, हा दिग्दर्शक ऑडिशनसाठी मुंबईत आला होता आणि अनेक अभिनेत्री त्याला भेटण्यासाठी जमल्या होत्या. डेझी म्हणाली, “एका दाक्षिणात्य दिग्दर्शकाने मला चुकीच्या पद्धतीने स्पर्श केला होता. तो कास्टिंगसाठी मुंबईत आला होता आणि आम्ही ६-७ मुली त्याला भेटायला गेलो होतो. तो प्रत्येकीला वैयक्तिकरित्या भेटत होता. मला भेटल्यानंतर त्याने ज्याप्रकारे माझा हात पकडला आणि मला स्पर्श केला, ते मला अजिबातच आवडलं नाही.”

ती पुढे म्हणाली, “मला कोणीही स्पर्श केलेला आवडत नाही. अगदी महिलांकडून मसाज करून घेणेही मला आवडत नाही, तिथे पुरुषाचा स्पर्श तर लांबची गोष्ट आहे. त्या प्रकारामुळे मी खूप चिडले होते. मी त्याला कळवते असे सांगितले, पण त्यानंतर मी त्याच्याशी कधीच संपर्क केला नाही.”

या घटनेने डेझीच्या मनावर मोठा परिणाम केला आणि तिला सुरक्षेबाबत एक महत्त्वाचा धडा मिळाला. त्याबद्दल बोलताना ती म्हणाली, “या घटनेने मला शिकवले की, कामाच्या निमित्ताने कोणालाही कधीही एकट्याने भेटू नये.”

याच मुलाखतीत डेझीने तिच्या करिअरबद्दल होणाऱ्या चर्चेवरही प्रतिक्रिया दिली. ‘डेझी शाहचे करिअर फक्त सलमान खानमुळेच सुरू आहे’, या टीकेवर ती म्हणाली, “जेव्हा एखादी महिला चांगले काम करते, तेव्हा लोकांना वाटते की तिला नक्कीच कोणाचा तरी पाठिंबा आहे. यात काही चुकीचे नाही. आज जर मी कोणाला मदत करत असेल, तर ते यासाठी कारण कधीकाळी मला कोणीतरी मदत केली होती. हे एक चक्र आहे. पण लोक याकडे सकारात्मकतेने पाहत नाहीत. आता मला या गोष्टींचे वाईट वाटत नाही, मला आता अशा टीकेची सवय झाली आहे.”

View this post on Instagram

A post shared by Daisy Shah (@shahdaisy)

दरम्यान, डेझीच्या कामाबद्दल सांगायचं झाल्यास, तिनं अनेक वर्षे बॅकग्राऊंड डान्सर म्हणून काम केलं आहे. नंतर २०११ साली आलेल्या कन्नड चित्रपट ‘भद्र’मधून ती अभिनय क्षेत्रात आली. पुढे सलमान खानच्या ‘जय हो’ चित्रपटात डेझी मुख्य भूमिकेत दिसली. यामुळे तिला भरपूर प्रसिद्धी आणि लोकप्रियता मिळाली. यासह तिने ‘हेट स्टोरी ३’, ‘रेस ३’, ‘गुजरात ११’, ‘मिस्ट्री ऑफ द टॅटू’ यांसारख्या चित्रपटांमध्येही काम केले आहे.