Chetak Screen Awards 2026 Best Director Winner: प्रतिभावान दिग्दर्शकांच्या स्पर्धेत आदित्य धर यांनी बाजी मारली आहे. ‘धुरंधर’ चित्रपटासाठी त्यांना चेतक स्क्रीन अवॉर्ड्स २०२६ मध्ये ‘सर्वोत्कृष्ट दिग्दर्शक’ या पुरस्काराने सन्मानित करण्यात आले. त्याचे प्रभावी व्हिजन आणि कथानकातील बारकावे प्रेक्षक आणि समीक्षक दोघांनाही मनापासून भावले.
या श्रेणीमध्ये मोठ्या ब्लॉकबस्टरपासून ते समीक्षकांनी वाखाणलेल्या चित्रपटांपर्यंत विविध दिग्दर्शकांचा समावेश होता. यामध्ये ‘छावा’साठी लक्ष्मण रामचंद्र उतेकर, ‘हक’साठी सुपर्ण एस. वर्मा आणि ‘होमबाउंड’साठी नीरज घायवान यांनाही नामांकन मिळालं होतं. तसेच ‘जुगनुमा: द फेबल’साठी राम रेड्डी, ‘सैयारा’साठी मोहित सुरी आणि ‘सुपरबॉईज ऑफ मालेगाव’साठी रीमा कागती हेदेखील स्पर्धेत होते.
महाराष्ट्राचे मुख्यमंत्री देवेंद्र फडणवीस आणि ‘द इंडियन एक्सप्रेस ग्रुप’चे कार्यकारी संचालक अनंत गोएंका यांच्या हस्ते हा पुरस्कार प्रदान करण्यात आला. मात्र, आदित्य धर स्वतः या सोहळ्याला उपस्थित नव्हते. या कार्यक्रमाचे सूत्रसंचालन बॉलीवूड अभिनेत्री आलिया भट्ट, कॉमेडियन झाकीर खान आणि सुनील ग्रोवर, तसेच इंडियन एक्सप्रेस हिंदीचे संपादक सौरभ द्विवेदी यांनी केले.
‘द इंडियन एक्सप्रेस ग्रुप’द्वारे सुरू करण्यात आलेले ‘चेतक स्क्रीन अवॉर्ड्स’ हे भारतातील अत्यंत प्रतिष्ठित आणि विश्वसनीय चित्रपट पुरस्कार मानले जातात. कलेचा गौरव हा केवळ गुणवत्ता, प्रामाणिकपणा आणि आदर यावरच आधारित असावा, या विश्वासातून या पुरस्कारांची सुरुवात करण्यात आली आहे. १९९५ मध्ये इंडियन एक्सप्रेस समूहाने सुरू केलेले हे पुरस्कार सात वर्षांच्या खंडानंतर पुन्हा दिमाखात पार पडले. या सोहळ्याचे सूत्रसंचालन अभिनेत्री आलिया भट्ट, सुनील ग्रोवर, झाकीर खान आणि सौरभ द्विवेदी यांनी केले.
विजेते निवडण्याची पद्धत
शॉर्टलिस्टिंगनंतर स्क्रीन अकादमीने एका शिस्तबद्ध मतदान प्रक्रियेद्वारे चित्रपटांचे मूल्यमापन केले. लॉस एंजेलिसमधील ‘युनिव्हर्सिटी ऑफ सदर्न कॅलिफोर्निया’ येथील सिनेमा आणि मीडिया स्टडीजच्या प्रमुख आणि स्क्रीन अकादमीच्या स्कॉलर-इन-रेसिडेंस डॉ. प्रिया जयकुमार यांनी यासाठी सविस्तर मार्गदर्शक तत्त्वे तयार केली होती.
या अकादमीमध्ये चित्रपटसृष्टीतील अनेक दिग्गज सामील आहेत, ज्यात सुजित सरकार, दीपा मेहता, श्रीराम राघवन, राम माधवानी, कबीर खान, करण जोहर, राजकुमार हिराणी, आर. एस. प्रसन्ना आणि राजीव मेनन या दिग्दर्शकांचा समावेश आहे. तसेच कलाकार आणि इतर तज्ज्ञांमध्ये विद्या बालन, जॉन अब्राहम, प्रसेनजित चॅटर्जी, गुनीत मोंगा कपूर, मुकेश छाब्रा, पायल कपाडिया, रसूल पुकुट्टी आणि रिमा दास यांचा समावेश आहे.
