झीनत अमान यांच्या एकतर्फी प्रेमात आकंठ बुडालेले देव आनंद; अभिनेत्रीने राज कपूर यांना मिठी मारताच…

देव आनंद यांनी त्यांची आत्मकथा ‘रोमॅन्सिंग विथ लाइफ’ या पुस्तकामध्ये त्यांचे सिनेविश्वातील अनुभव शेअर केले आहेत. याचबरोबर झीनत अमान यांच्यावर झालेल्या प्रेमाचा आवर्जून उल्लेख केला आहे. १९७८ साली प्रदर्शित झालेल्या ‘सत्यम शिवम सुंदरम’ या सिनेमातील झीनत यांच्या बोल्ड सीनने सर्वांना आश्चर्यचकित केले होते. त्यांच्या अदांनी प्रेक्षकांसह देव आनंद यांनाही घायाळ केले होते. ‘हरे रामा हरे कृष्णा’ या सिनेमापासून देव आनंद यांना झीनत अमान यांच्याबद्दल प्रेम निर्माण झाले. देव आनंद यांचे झीनत अमान यांच्यावरील प्रेम दिवसेंदिवस वाढत होते, पण त्यांनी कधीच भावना व्यक्त केल्या नाहीत. मात्र, झीनत अमान यांची राज कपूर यांच्याबरोबर वाढलेली मैत्री देव आनंद यांच्या मनाला टोचत होती.

राज कपूर यांनी नशेमध्ये झीनतला मारलेली मिठी

राज कपूर व झीनत अमान यांच्यामध्ये व्यावसायिक नात्यासह मैत्रीचे चांगले नाते निर्माण झाले होते. पण, त्यांची ही मैत्री देव आनंद यांना आवडत नव्हती. त्यांच्या ‘रोमॅन्सिंग विथ लाइफ’ या आत्मचरित्रात देव आनंद यांनी एका पार्टीचा प्रसंग सांगितला. त्यांनी लिहिले, “एका पार्टीमध्ये राज कपूर यांना नशेमध्ये झीनतला मिठी मारताना पाहिलं होतं, त्यामुळे माझं मन पूर्णपणे तुटलं होतं. मला त्यांच्यामध्ये फक्त दिग्दर्शक आणि अभिनेत्री एवढं नातं आहे असं वाटत नव्हतं,” पण नंतर झीनत यांनी राज कपूर यांच्याशी असं कोणतंही नातं नसल्याचं स्पष्ट केलं होतं.

झीनत यांचा सिगारेट पिण्याचा खास अंदाज

देव आनंद यांनी आत्मचरित्रात झीनत अमानबद्दलच्या भावना व्यक्त केल्या आहेत. झीनतच्या सौंदर्यावर आणि तिच्या व्यक्तिमत्त्वावर अक्षरशः फिदा झाल्याचं देव आनंद यांनी आत्मचरित्रात म्हटलं आहे. पण, हे प्रेम त्यांनी कधीच तिच्यासमोर व्यक्त केलं नाही. ‘हरे रामा हरे कृष्णा’ या चित्रपटासाठी अभिनेत्रीचा शोध सुरू असताना एका पार्टीत त्यांची झीनत अमानशी भेट झाली. त्या वेळी झीनत हातात सिगारेट घेऊन अगदी बिनधास्त पार्टीचा आनंद घेत होत्या. त्यावेळी झीनत यांचा सिगारेट पिण्याचा खास अंदाज देव आनंद यांना इतका भावला की त्यांनी क्षणाचाही विलंब न लावता झीनत यांची चित्रपटासाठी निवड केली. त्यानंतर ‘हरे रामा हरे कृष्णा’चं शूटिंग नेपाळमध्ये करण्यात आलं.

‘सत्यम शिवम सुंदरम’ घाणेरडा चित्रपट – देव आनंद

‘सत्यम शिवम सुंदरम’ या चित्रपटाबद्दल देव आनंद यांनी पत्रकार सांघवी यांना सांगितलं होतं, “हा एक घाणेरडा चित्रपट आहे, तुम्ही नीट पाहिलं का? संपूर्ण सिनेमात कॅमेरा सतत झीनतच्या शरीरावरच फोकस करत आहे. झीनतच्या अभिनयापेक्षा तिच्या सौंदर्यांचा वापर करून घेण्यात आला आहे.” ‘सत्यम शिवम सुंदरम’ चित्रपटातील झीनत यांच्या बोल्ड सीनमुळे देव आनंद राज कपूर यांच्यावर नाराज होते.