शाळेत ईशा देओलला वडिलांच्या पहिल्या लग्नाबद्दल समजलेलं; तिने घरी जाऊन आई हेमा मालिनींना विचारलं अन्…

राम कमल मुखर्जी यांनी लिहिलेल्या हेमा मालिनी यांच्यावरील ‘हेमा मालिनी: बियॉन्ड द ड्रीम गर्ल’ या पुस्तकात ईशाने याचा उल्लेख केला आहे. शाळेतील मुलांनी तिला तिच्या वडिलांच्या पहिल्या लग्नाबद्दल सांगितलं होतं. “तुला दोन आया आहेत ना?” असं ईशाला तिच्या वर्गातील एका मुलाने विचारलं. हे ऐकून ईशाला धक्का बसला होता. तिने नकार दिला होता. “मी लगेच त्याला उत्तर दिलं ‘काय फालतू बोलतोय! माझी फक्त एकच आई आहे,” असं ईशा देओल म्हणाली होती.

ईशाने घरी आल्यावर हेमा मालिनींना विचारलं अन्…

ईशाने तेव्हा त्या मुलाला उत्तर दिलं, पण हा प्रश्न तिच्या मनातून गेला नाही आणि घरी पोहोचल्यावर तिने तिच्या आईला याबद्दल विचारले. तेव्हा हेमा मालिनींनी तिला खरं काय ते सांगितलं. “मी घरी गेल्यावर माझ्या आईला सांगितलं की वर्गातील एकजण मला असा प्रश्न विचारत आहे. मला वाटतं तेव्हाच माझ्या आईने मला सत्य सांगायचं ठरवलं. कल्पना करा, मी चौथीत होते आणि मला याबद्दल काहीच कल्पना नव्हती. आजकालची मुलं खूप हुशार आहेत,” असं ईशाने म्हटलं होतं.

वडिलांच्या दुसऱ्या लग्नाबद्दल ईशा देओलला काय वाटलेलं?

हेमा मालिनींनी जे सांगितलं, त्याबद्दल ईशा म्हणाली, “तर, तेव्हा मला समजलं की माझ्या आईने अशा पुरुषाशी लग्न केलंय, ज्याचं लग्न आधीच दुसऱ्या महिलेशी झालं आहे आणि त्यांचंही कुटुंब आहे.” वडिलांचा भूतकाळ समजल्यावर फार वाईट वाटलं नाही. त्यात काही चुकीचं आहे असं वाटत नाही. आई-वडिलांनी त्या गोष्टीबद्दल कधीच अस्वस्थ वाटू दिलं नाही, असं ईशा देओलने नमूद केलं.

वडील कधीच रात्री घरी नसायचे

ईशा मोठी होत असताना तिचे वडील धर्मेंद्र कधीच रात्री घरी नसायचे. रात्री जेवण केल्यानंतर ते बाहेर पडायचे. पण तिला सगळं सामान्य वाटायचं, कारण ती त्यांना असंच बघत मोठी झाली. “मी लहान असताना, मी माझ्या मित्रांच्या घरी जायचे, त्यांचे आई-वडील दोघेही त्यांच्याबरोरब असायचे. तेव्हा मला जाणवलं की वडील मुलांजवळ असणं ही सामान्य गोष्ट आहे. पण आम्हाला या बाबतीत कसं तरी समजावण्यात आलं होतं. मी माझ्या आईवर खूप समाधानी होते आणि माझं माझ्या वडिलांवर खूप प्रेम होतं,” असं ईशा देओलने म्हटलं होतं.

धर्मेंद्र यांचे २४ नोव्हेंबर रोजी निधन झाली. गुरुवारी धर्मेंद्र यांच्या पहिल्या पत्नी प्रकाश कौर आणि मुलांचे सनी देओल आणि बॉबी देओल यांनी प्रार्थना सभा आयोजित केली होती. पण त्यांची दुसरी पत्नी हेमा मालिनी आणि त्यांच्या मुली ईशा देओल आणि अहाना देओल या प्रार्थना सभेला गेल्या नाही. गोविंदाच्या पत्नी सुनीता आहुजाने सांगितलं की हेमा मालिनींनी त्यांच्या घरी धर्मेंद्र यांच्या स्मृतीप्रित्यर्थ गीता पाठ आणि भजन संध्या आयोजित केली होती.