‘हा’ दाक्षिणात्य सिनेमा ‘धुरंधर २’ला देतोय टक्कर, चित्रपटाच्या कमाईवर होतोय परिणाम; घ्या जाणून…

१९ मार्चपासून ‘धुरंधर २’ चित्रपटगृहात प्रदर्शित झाला आहे, तर सॅकनिल्कच्या वृत्तानुसार पहिल्या दिवशी या चित्रपटाने आत्तापर्यंत ९८.५२ कोटींचं कलेक्शन केलं आहे. परंतु, ‘धुरंधर २’ ला एक दाक्षिणात्य चित्रपट टक्कर देत असून यामुळे ‘धुरंधर २’च्या कमाईवर परिणाम होत असल्याचं म्हटलं जात आहे. १९ मार्च रोजी ‘धुरंधर’बरोबर अजून एक चित्रपट रिलीज झाला आहे. दाक्षिणात्य अभिनेता पवन कल्याण मुख्य भूमिकेत असलेल्या या चित्रपटाचं नाव आहे ‘उस्ताद भगत सिंह.’ या चित्रपटामुळे ‘धुरंधर २’वर कसा परिणाम होत आहे आणि चित्रपटाचं किती नुकसान झालं आहे याबद्दल सविस्तर जाणून घेऊयात…

किती केली कमाई?

‘सॅकनिल्क’च्या वृत्तानुसार पवन कल्याणची मुख्य भूमिका असलेल्या आणि तेलुगूमध्ये रिलीज झालेल्या ‘उस्ताद भगत सिंह’ या चित्रपटाने पहिल्या दिवशी चार वाजेपर्यंत १६ कोटी रुपये कमावले आहेत, तर ‘धुरंधर २’ च्या तेलुगू वर्जनने याच वेळेपर्यंत फक्त १.२१ कोटी इतकी कमाई केली आहे, तर ‘धुरंधर २’च्या कन्नड वर्जनने फक्त ६ लाखांचा गल्ला जमवला आहे; तर मल्याळम ३ लाख, तमिळ ६० लाख इतकी कमाई केली आहे. महत्त्वाचं म्हणजे ‘धुरंधर २’चं तेलुगू वर्जन बऱ्याचशा थिएटर्समध्ये प्रदर्शित झालेला नाहीये.

‘एबीपी’च्या वृत्तानुसार हैदराबादमध्ये ‘उस्ताद भगत सिंह’चे ७५४ इतके शो सुरू असून ‘सॅकनिल्क’च्या वृत्तानुसार यामध्ये मॉर्निंग शोजचं प्रमाण अधिक आहे. दुसरीकडे ‘धुरंधर २’च्या तेलुगू वर्जनचे हैदराबाद येथे फक्त ८३ शो सुरू आहेत.

‘धुरंधर २’मुळे तेलुगू प्रेक्षक नाराज

‘धुरंधर २’च्या तेलुगू वर्जनला मिळत असलेल्या कमी प्रतिसादाचं कारण मेकर्स असल्याचं म्हटलं जात आहे. उल्लेख केलेल्या माध्यमाच्या वृत्तानुसार १८ मार्चला होणारे पेड प्रीमियर रद्द करण्यात आले आणि त्यानंतर तेलुगू भाषेसहित इतर काही भाषेतील वर्जनसुद्धा वेळेत रिलीज झालेले नाही. त्यामुळे आता पुढे ‘धुरंधर २’ किती कमाई करणार याकडे सर्वांचं लक्ष लागलं आहे.