साजिद नाडियादवालासह लग्न करण्यासाठी दिव्या भारतीने केलेलं धर्मांतर, वडिलांपासून लपवून ठेवलेलं सत्य; आईनेच केलेला खुलासा…

दिव्या भारतीचा जन्म २५ फेब्रुवारी १९७४ मध्ये मुंबईत झालेला. परंतु, वयाच्या अवघ्या १९ व्या वर्षी ५ एप्रिल १९९३ रोजी तिचं निधन झालं. परंतु, इतक्या कमी वयातच तिने स्टारडम, प्रेम आणि वैवाहिक जीवन सगळं अनुभवलं होतं. बॉलीवूडमध्ये अनेक प्रेमकहाण्या पाहायला मिळाल्या. परंतु, दिव्या भारती व साजिद नाडियादवाला यांच्या इतकी दुःखद प्रेमकहाणी कोणाचीच नसेल.

कशी झालेली दोघांची भेट

जनसत्ताच्या वृत्तानुसार दोघांची भेट ‘शोला और शबनम’ या चित्रपटाच्या सेटवर झालेली. चित्रपटात दिव्या भारती गोविंदाची नायिका होती आणि गोविंदाला भेटण्यासाठी साजिद सेटवर आले होते. परंतु, त्यांनी दिव्याला पाहिलं आणि ते पाहता क्षणीच तिच्या प्रेमात पडले. कालांतराने दोघांमध्ये घट्ट मैत्री निर्माण झाली आणि पुढे त्याचं रूपांतर प्रेमात झालं.

गुपचूप केलेलं लग्न

दोघांनी १० मे १९९२ मध्ये लग्न केलं होतं. त्यावेळी दिव्या भारती फक्त १८ वर्षांची होती आणि साजिद यांचा धर्म वेगळा असल्याने आणि करिअरवर लक्ष केंद्रित करण्यासाठी दिव्याने लग्नाबद्दल कोणालाही काही न सांगण्याचा निर्णय घेतला. याबद्दल तिच्या वडिलांना म्हणजेच ओम प्रकाश भारती यांना भणकही नव्हती, परंतु तिच्या आईला सर्व माहिती होतं. इंडिया.कॉमच्या वृत्तानुसार दिव्या भारती यांनी साजिद यांच्यासह लग्न करण्यासाठी धर्मांतर केलं होतं आणि नाव बदलून सना ठेवलं होतं.

आईनेच केलेला खुलासा

बॉलीवूड हंगामाशी संवाद साधताना दिव्याच्या आईने मीता भारती यांनी याबद्दल खुलासा केलेला. त्यांनी सांगितलेलं की, साजिद नाडियादवाला चित्रपटाच्या सेटवर गोविंदाला भेटायला यायचे आणि तिथेच त्यांची दिव्याशी भेट झाली. त्याच दिवशी दिव्याने तिच्या आईला साजिद यांच्याबद्दल सांगितलेलं. काही दिवसांनंतर दिव्याने तिच्या आईला साजिद बरोबर लग्न करण्याची इच्छा असल्याचं म्हटलेलं. तेव्हा त्यांनी वडिलांना विचारायला हवं असं सांगितलेलं. तिचे वडील या विरोधात होते.

मीता यांनी सांगितले की, दिव्या भारतीच्या वडिलांना साजिदबद्दल स्वतःची ठाम मते होती आणि ते या लग्नाच्या विरोधात होते. दिव्या १८ वर्षांची झाल्यावर तिने आईला फोन करून सांगितलं की, त्या दिवशीच ती साजिदसोबत लग्न करत आहे आणि आईने साक्षीदार म्हणून सही करावी अशी तिची इच्छा होती. मात्र, तिच्या आईने तिला स्पष्ट सांगितलं की जोपर्यंत ती आपल्या वडिलांना याबाबत सांगत नाही, तोपर्यंत त्या लग्नाला येणार नाहीत. आईच्या बोलण्याकडे दुर्लक्ष करून दिव्याने लग्न केलं. पण, साजिदसोबत राहण्याऐवजी ती आपल्या आई-वडिलांसोबतच राहत होती आणि अधूनमधूनच पतीला भेटत असायची. तिच्या वडिलांना या लग्नाबद्दल काहीही माहिती नव्हती.

दिव्याच्या आईने पुढे सांगितलं, “काही महिन्यांनी, दिवाळीच्या वेळी साजिद आम्हाला भेटायला आले. दिव्याचे वडील आणि साजिद बोलत असताना साजिदने त्यांना सांगितलं की त्यांनी आणि दिव्याने लग्न केलं आहे. तिच्या वडिलांनी एक शब्दही उच्चारला नाही, ते पूर्णपणे शांत राहिले.”