“तिच्या व्हॅनिटी व्हॅनच्या बाहेर ३ तास…”, भर कार्यक्रमात ऐश्वर्या रायला ‘प्लास्टिक’ म्हटलं! आता माफी मागण्यास तयार, इमरान हाश्मी म्हणतो…

‘कॉफी विथ करण’च्या चौथ्या पर्वाच्या एका भागात इमरान हाश्मी सहभागी झाला होता. या शोमध्ये एक गिफ्ट हँपर जिंकण्यासाठी रॅपिड फायर राऊंड खेळवला जातो. या सेगमेंटमध्ये करण शोमध्ये सहभागी झालेल्या सेलिब्रिटींना इंडस्ट्री संदर्भात विविध प्रश्न विचारतो. याचदरम्यान, इमरानने ऐश्वर्या राय-बच्चनला ‘प्लास्टिक’ म्हटलं होतं. यानंतर त्याला सोशल मीडियावर प्रचंड ट्रोल करण्यात आलं होतं. “एक हँपर जिंकण्यासाठी मी ऐश्वर्याला प्लास्टिक म्हणालो होतो..पण त्याचा निश्चितच मला पश्चाताप आहे”, असं अभिनेत्याने यावर सांगितलं.

‘लल्लनटॉप’ला दिलेल्या मुलाखतीमध्ये इमरानला विचारण्यात आलं की, ऐश्वर्या राय-बच्चनला ‘प्लास्टिक’ म्हटल्याचा पश्चाताप होतोय का? या प्रश्नावर इमरान म्हणाला, “हो! मला या गोष्टीचा आजही पश्चाताप आहे. कारण, मी तिचा खूप सन्मान करतो आणि मला या वक्तव्याचा पश्चाताप कायम राहील. आता लोक खूप जास्त संवेदनशील झाले आहेत आणि सोशल मीडियावर प्रत्येक गोष्टीवर नाराजी व्यक्त केली जाते…आणि मला खरंच माझी ही चूक मान्य आहे.”

“खरंतर, हम दिल दे चुके सनम’ सिनेमा प्रदर्शित झाल्यावर मी ऐश्वर्याचा खूप मोठा चाहता होतो आणि अजूनही मी तिचा फॅन आहे. मी फक्त तिला पाहण्यासाठी तिच्या व्हॅनिटी व्हॅनच्या बाहेर ३ तास उभा होतो. काही वर्षांपूर्वी माझ्या ‘कसूर’ सिनेमाचं शूटिंग सुरू होतं आणि तेव्हाच तिथे ऐश्वर्या सुद्धा तिच्या एका प्रोजेक्टचं शूट करत होती…पण, मी आजवर तिला भेटलेलो नाहीये. मला तिला एकदा तरी भेटायला आवडेल आणि तिला मी केलेल्या वक्तव्याचं वाईट वाटलं असेल, तर मी तिची नक्कीच माफी मागेन.”

दरम्यान, २०१९ मध्ये फिल्मफेअरला दिलेल्या मुलाखतीमध्ये ऐश्वर्या म्हणाली होती की, “मी फेक आणि प्लास्टिक असल्याचं म्हटलं गेलं आहे; जे अत्यंत वाईट आहे.” या वक्तव्यामुळेच ऐश्वर्याने इमरान हाश्मीबरोबर काम करण्यास नाकारलं होतं, अशा चर्चाही रंगल्या होत्या.