बॉलीवूडची अभिनेत्री सारा अली खान सध्या तिच्या आगामी ‘जरा हटके जरा बचके’ या चित्रपटामुळे चर्चेत आहे. या चित्रपटात साराबरोबर अभिनेता विकी कौशल मुख्य भूमिकेत आहे. दरम्यान, सारा अली खान विकी कौशलबरोबर आयपीएलचा अंतिम सामना पाहण्यासाठी नरेंद्र मोदी स्टेडियमवर पोहोचली होती. या सामन्यादरम्यान साराचा एक व्हिडीओ सोशल मीडियावर मोठ्या प्रमाणात व्हायरल झाला आहे. या व्हिडीओवरून नेटकऱ्यांनी साराला शुबमन गिलचे नाव घेत ट्रोल केलं आहे.
हेही वाचा- आमिर खानच्या चित्रपटात काम करण्यास सलमान खानचा नकार; ‘हे’ कारण आलं समोर
आयपीएल-२०२३ च्या अंतिम सामन्यात ‘चेन्नई सुपर किंग्स’ने ‘गुजरात टायटन्स’चा पराभव करीत विजेतेपद पटकावले. या सामन्याला बॉलीवूड अभिनेत्री सारा अली खान आणि अभिनेता विकी कौशल यांनीही हजेरी लावली होती. चेन्नई सुपर किंग्सने आयपीएल विजेतेपदावर नाव कोरल्यावर विकी-साराने जल्लोष केला. अंतिम चेंडूवर चौकार मारत चेन्नईने कसा सामना जिंकला याचा व्हिडीओ या दोघांनीही आपल्या इन्स्टाग्रामवर शेअर केला आहे.
व्हिडीओमध्ये साराला जल्लोष करताना पाहून नेटकऱ्यांनी तिला ट्रोल करायला सुरुवात केली आहे. एका युजरने या व्हिडीओवर कमेंट करीत “सारा दीदी बेवफा है” असं म्हटलं आहे. तर दुसऱ्याने “ओव्हर अ‍ॅक्टिंगचे पैसे कापा…, “हे दोघेही संपूर्ण सामना संपेपर्यंत गुजरातला पाठिंबा देत होते, आता फक्त नाटक करीत आहेत.” अशा कमेंट केल्या आहेत.
खरं तर सारा अली खान आणि शुबमन गिल बऱ्याच दिवसांपासून चर्चेत आहेत. दोघांनाही अनेक ठिकाणी एकत्र बघण्यात आलं होतं. एवढंच नाही तर त्यांच्या अफेअरची चर्चाही सुरू झाली होती. तर अलीकडेच सारा अली खान आणि शुबमनने सोशल मीडियावर एकमेकांना अनफॉलो केल्याच्या बातम्या आल्या होत्या. दोघांनीही एकमेकांना अनफॉलो केल्यामुळे त्यांच्यात काही तरी बिनसल्याच्याही चर्चा सुरू होत्या.
दरम्यान, विकी कौशल आणि सारा अली खान यांचा ‘जरा हटके जरा बचके’ हा चित्रपट २ जूनला प्रेक्षकांच्या भेटीला येणार आहे. त्यामुळे दोघेही सध्या चित्रपटाचे प्रमोशन करण्यात व्यस्त आहेत. चित्रपटात राकेश बेदी, शारिब हाश्मी, नीरज सूद यांसारखे अनेक दिग्गज कलाकार महत्त्वाच्या भूमिकेत दिसणार आहेत.
