बॉलीवूड अभिनेता गोविंदा नेहमी चर्चेत असतो. नव्वदच्या दशकात गोविंदानं अनेक सुपरहिट चित्रपट दिले. अनेक दिग्दर्शक, निर्मात्यांची गोविंदाला चित्रपटात घेण्यासाठी रांग लागायची. मात्र, कालांतराने चित्र बदललं आणि गोविंदाला चित्रपट मिळणं कमी झालं. नुकत्याच एका मुलाखतीत प्रसिद्ध दिग्दर्शक पहलाज निहलानी यांनी गोविंदाच्या करिअरबाबत मोठं विधान केलं आहे. एवढंच नाही तर गोविंदाच्या काम करण्याच्या पद्धतीवरही त्यांनी निशाणा साधला आहे.
हेही वाचा- ‘स्वदेस’ फेम अभिनेत्री गायत्री जोशीच्या कारचा भीषण अपघात; दोघांचा दुर्दैवी मृत्यू
निहलानी म्हणाले, “हे सगळं डेव्हिड धवन यांनी सुरू केलं होतं. जेव्हा मी माझ्या चित्रपटांमध्ये अनिल कपूरला घेतलं तेव्हा डेव्हिड धवन यांनी माझ्याविरोधात गोविंदाचे कान भरले. परिणामी गोविंदानं माझे चित्रपट अर्ध्यावर सोडले. परिणामी मला ते चित्रपट दुसऱ्या अभिनेत्याबरोबर पूर्ण करावे लागले. एवढंच नाही, तर गोविंदा प्रत्येक वेळी आपलं दुखणं घेऊन मीडियासमोर जात होता. तो सलमान आणि शाहरुखच्या नावानंही नेहमी रडायचा. याचा परिणाम त्याच्या करिअरवर झाला आणि आज बघा तो घरी बसला आहे. “
८० व ९० च्या दशकात गोविंदाचं नाव आघाडीच्या अभिनेत्यांमध्ये घेतलं जायचं. एकाच वेळी त्याच्याकडे ३० ते ४० चित्रपट असायचे. मात्र, ९० च्या दशकानंतर गोविंदाची जादू ओसरू लागली. त्याच्यामागे मुख्य कारण होतं ते म्हणजे त्याचं सेटवर उशिरा पोहोचणं. प्रत्येक चित्रपटाच्या सेटवर तो तासन् तास उशिरा पोहोचायचा. परिणामी निर्मात्यांनी त्याला चित्रपटांत घेणं बंद केलं. पार्टनर या चित्रपटात सलमान खानच्या मदतीनं गोविंदानं बॉलीवूडमध्ये पुन्हा कमबॅक केलं; पण त्याचा त्याला जास्त फायदा झाला नाही.
