‘हनुमान अंश’ गाठणार १०० कोटींचा टप्पा? यशच्या ‘टॉक्सिक’ला मागे टाकून केली जबरदस्त कमाई; बॉक्स ऑफिस कलेक्शन किती?

‘हनुमान अंश’ बॉक्स ऑफिस कलेक्शन

सॅकनिल्कच्या आकडेवारीनुसार, विशाल चतुर्वेदी यांनी दिग्दर्शित केलेल्या ‘हनुमान अंश’नं गुरुवारी बॉक्स ऑफिसवर जबरदस्त कमाई केली.
सिनेमा प्रदर्शित झाल्यानंतर, २८ व्या दिवशी भारतात तब्बल ११ कोटी रुपयांची नेट कमाई केल्याचा अंदाज आहे. गुरुवारी या चित्रपटाचे सात हजारहून अधिक शो दाखवण्यात आले. विशेष म्हणजे, बुधवारी (२ सप्टेंबर) चित्रपटानं ७.७५ कोटी रुपयांची कमाई केली होती. त्या तुलनेत गुरुवारच्या कमाईत तब्बल ४१.९ टक्क्यांची वाढ झाली आहे.

‘हनुमान अंश’ सिनेमाची ‘टॉक्सिक’ला मागे टाकून आघाडी

दुसरीकडे, दाक्षिणात्य स्टार यशच्या ‘टॉक्सिक’ चित्रपटाला त्याच दिवशी ’हनुमान अंश’पेक्षा अधिक शो देण्यात आले होते. ’टॉक्सिक’चे संपूर्ण देशात १०,८६३ शो झाले; पण त्यातून तुलनेनं कमी कमाई झाली आहे. टॉक्सिक सिनेमानं फक्त ४.२५ कोटी रुपयांची कमाई केली. त्यामुळे हनुमान अंश या भक्तीपर आधारित सिनेमानं यशच्या ‘टॉक्सिक’ला मागे टाकून आघाडी घेतली आहे.

केवळ दोन कोटींच्या बजेटमध्ये तयार करण्यात आलेल्या ‘हनुमान अंश’ सिनेमाची ओपनिंग अगदीच १० लाख रुपयांची झाली होती. हा चित्रपट ‘आवारापन २’ व ‘बटवारा’ यांच्याबरोबर प्रदर्शित झाला होता. त्यानंतर यशचा ‘टॉक्सिक’ सिनेमा आल्यानं हनुमान अंश या सिनेमाला शोसुद्धा मिळत नव्हते. मोठे चित्रपट प्रदर्शित होणार असल्यानं थिएटरमालकांनी शोची संख्या कमी केली. २५० शोवरून आमची संख्या थेट २५ शोवर आणली गेली होती. पीव्हीआर आणि सिनेपोलिससारख्या प्राइम लोकेशनवरील मल्टिप्लेक्ससुद्धा शो सुरू ठेवण्याबाबत शंका व्यक्त करीत असल्याचे विशाल चतुर्वेदी यांनी सांगितले होते.

‘हनुमान अंश’ १०० कोटींचा टप्पा गाठण्याची शक्यता

पण, आता ‘हनुमान अंश’ची घोडदौड सुरूच आहे आणि या सिनेमाची भारतातील नेट कमाई ७२.८८ कोटी रुपयांवर पोहोचली आहे. तर, भारतातील ग्रॉस कलेक्शन ८५.९७ कोटी रुपये झाले आहे. भारतीय प्रेक्षकांनी ‘हनुमान अंश’ला चांगला प्रतिसाद दिल्यामुळे आता सिनेमा आंतरराष्ट्रीय स्तरावर रिलीज होणार आहे. ११ सप्टेंबर २०२६ रोजी ‘हनुमान अंश’ जगभरात प्रदर्शित होणार आहे. अजूनही सिनेमाबाबत प्रेक्षकांमध्ये उत्सुकता निर्माण होत असून, ‘हनुमान अंश’ लवकरच १०० कोटींचा टप्पा पार करण्याची शक्यता व्यक्त केली जात आहे.