“ज्यांना मुलं आहे त्यांना फक्त…”, दीपिका पादुकोणचा उल्लेख करत मराठमोळ्या अभिनेत्रीचा टोला; म्हणाली, “सलग ५ दिवस…”

कलाकार दिवसाला १२ तास काम करतो, तर कधी त्याहून अधिक काळ काम करत असतो; त्यामुळे खासगी आयुष्य, कुटुंब यासाठी त्यांना वेळच मिळत नाही. एवढंच काय तर कामामुळे ते इतके व्यग्र असतात की त्यांना स्वत:साठीसुद्धा वेळ मिळत नाही, त्यामुळे अनेकदा त्यांच्या प्रकृतीवरही परिणाम होतो. अशातच आता मराठमोळी अभिनेत्री ईशा कोपिकरनेसुद्धा याबद्दलचा तिचा अनुभव सांगितला आहे.

सलग ५ दिवस अगणित तास काम केल्यामुळे ईशा कोपिकरला चक्क रुग्णालयात दाखल व्हावं लागलेलं, याबद्दल तिने सांगितलं आहे. ईशान भारती सिंह व हर्ष लिंबाचियाला दिलेल्या मुलाखतीत तिने याबद्दल सांगितलं आहे. ईशा नेमकं काय म्हणाली याबद्दल सविस्तर जाणून घेऊयात…

दीपिका पादुकोणबद्दल काय म्हणाली ईशा कोपिकर?

भारतीने ईशाला तिची निवडणूक लढवण्याची इच्छा आहे, पण तिला तिच्या दोन मुलांमुळे राजकारणात इतका वेळ देता येणार नाही असं म्हटल्यानंतर ईशा कोपिकर यावर म्हणाली, “पण आता तर तुम्ही फक्त ८ तास देणं अपेक्षित असतं. ज्यांना मुलं आहे त्यांना फक्त ८ तास मिळतात.” असं म्हणत तिने दीपिका पादुकोणचं नाव न घेतला तिला टोमणा मारला. यावेळी हर्षने तिला गमतीत कोण म्हणालंय हे असं विचारल्यानतंर तिने हसत “मला नाही माहीत” असं उत्तर दलं.

ईशाला पुढे दिवसाला किती वेळ काम करते असं विचारल्यानंतर ती म्हणाली, “ते लोक तुम्हाला तुमच्यामध्ये उभे राहण्याची क्षमता आहे तोवर काम करायला लावतात.” हर्ष यावर गमतीत म्हणाला, “तुम्ही बेशुद्ध पडण्याच्या १५ मिनिटांपर्यंत ते तुम्हाला काम करायला लावतात.” पुढे ईशाने तिच्या चित्रपटांच्या शूटिंगदरम्यानचा एक अनुभव सांगितला. ईशा म्हणाली, “मी एकेकाळी इतकं सलग काम केलं आहे की मला फिल्म सिटीतून घरी जाण्यासाठीसुद्धा वेळ मिळत नव्हता.”

ईशा हा अनुभव सांगत पुढे म्हणाली, “मी निर्मात्याला सांगितलं की सेटवरच माझ्या राहण्याची सोय करा. तेव्हा मी ९ ते ५ आणि ७ ते ७ असं सलग शूटिंग करायचे. असं सलग ५ दिवस सुरूच होतं आणि सहाव्या दिवशी मी रुग्णालयात होते.”