‘देवदास’मध्ये चुन्नीलालची भूमिका अनेकांनी नाकारली, काय होतं कारण? जॅकी श्रॉफ म्हणाले, “शाहरुख खान असल्याने…”

‘रिपब्लिक भारत’ला दिलेल्या मुलाखतीत जॅकी श्रॉफ यांनी ‘देवदास’च्या आठवणी सांगितल्या. यावेळी प्रेक्षक म्हणून आलेल्या एका महिलेने हा चित्रपट पाच वेळा पाहिल्याचे सांगितले. त्यावर जॅकी श्रॉफ म्हणाले, “’देवदास’ची मुख्य भूमिका शाहरुख खान करत असल्याने कोणीही चुन्नीलाल ही भूमिका स्वीकारत नव्हते. ज्यांना या भूमिकेची ऑफर दिली जात होती ते म्हणायचे, सिनेमामध्ये तर भूमिकेचे नावही कुठे नाही. सिनेमाचं नावही ‘देवदास’ आहे, त्यामुळे कोणीही ही भूमिका स्वीकारण्यास तयार नव्हते.”

जॅकी श्रॉफ यांनी का स्वीकारली ‘देवदास’मधील भूमिका?

पुढे ते म्हणाले, “अनेकांनी नकार दिल्यानंतर पुढे ही भूमिका माझ्याकडे आली, तेव्हा मी सिनेमामध्ये काम करण्यासाठी होकार दिला. माधुरी दीक्षितजी या चित्रपटात आहेत आणि त्यांच्या व्यक्तिरेखेचं म्हणजेच चंद्रमुखीचा कोठा चालवणारा मी मालक आहे, मग मी तिथे का बसू नये असा विचार मी केला. मी त्यांना म्हणालो, ‘खूप छान.’ त्यानंतर मी विचारलं की, माझ्यासाठी अजून सिनेमामध्ये काय असणार आहे?”

यावर त्यांनी सांगितलं, ‘तुमच्यासाठी एक गाणं आहे आणि काही डायलॉग आहेत.’ मी डायलॉग वाचले आणि म्हणालो, ‘माझी भूमिका मध्यंतराच्या वेळी आली तरी मला काही फरक पडणार नाही, कारण मी फक्त उभा राहिलो तरी लोकांचे माझ्याकडे लक्ष जाईल आणि ‘देवदास’मध्ये लोकांनी मला पाहिलं व त्यांना काम आवडलं.”

पुढे जॅकी श्रॉफ यांनी महिलेला विचारले, “तुम्हीही हा चित्रपट पाहिला, मी दिसलो होतो ना?” पुढे ते म्हणाले, “जेव्हा कोणीही भूमिका स्वीकारत नाही, तेव्हा ती माझ्याकडे येते आणि मला ती स्वीकारण्यात काहीही त्रास होत नाही.”