“जया बच्चन अजिबातच उद्धट नाहीत…”, सहकलाकार विवेक वासवानी यांचे वक्तव्य; त्या पापाराझींवर चिडतात कारण…

विवेक वासवानी यांनी पूर्वी जया बच्चन यांच्याबरोबर काम केले आहे. त्यांच्याबद्दल बोलताना विवेक म्हणाले, “जयाजी कधीच उद्धट नव्हत्या; उलट त्या सर्वांशी खूप प्रेमानं वागायच्या. त्या सुपरस्टार होत्या. त्यांनी अनेक हिट चित्रपट दिले आहेत. त्यांनी रणधीर कपूर आणि मनोज कुमार यांच्याबरोबर काम केले आहे. त्या खूपच उत्कृष्ट अभिनेत्री आहेत आणि खूप गोड स्वभावाच्या आहेत.”

जया बच्चन पापाराझींवर का चिडतात, असे विचारले असता, विवेक म्हणाले, “मला नक्की माहीत नाही. कदाचित काळानुसार काही गोष्टी बदलल्या असतील किंवा सध्या त्या अभिनयात जास्त सक्रिय नसल्यामुळे त्यांना अशा गोष्टींकडे लक्ष द्यायला वेळ मिळत नसेल.” मात्र त्यांनी असेही सांगितले की, जया बच्चन आपल्या जवळच्या मित्रांशी खूप प्रेमाने वागतात. “त्यांच्या जवळच्या मित्र-मैत्रिणींमध्ये डिंपल कपाडिया, अबू जानी व संदीप खोसला यांच्याबरोबर त्या खूप छान वागतात,” असे ते म्हणाले.

विवेक पुढे पापाराझींना दोष देताना म्हणाले, “मला असे वाटते की, पापाराझी त्यांना मुद्दाम त्रास देतात. एकदा-दोनदा त्या चिडल्यानंतर आता पापाराझींना कळले आहे की, त्यांना नक्की कशामुळे राग येतो. त्यामुळे ते मुद्दाम त्यांना डिवचतात आणि त्या चिडतात. मला यात काही गंभीर असं वाटत नाही.”

संसदेतील त्यांच्या वागण्याबद्दल बोलताना विवेक यांनी नमूद केले, “संसदेत जयाजी मांडत असलेले मुद्दे अगदी योग्य असतात; पण ते मांडण्याची त्यांची पद्धत एखाद्या शाळेतील शिक्षिकेसारखी असते. त्यामुळे समोरच्या व्यक्तीला कदाचित ते आवडत नाही.”

काही काळापूर्वी जया बच्चन यांनी पापाराझींबद्दल केलेल्या एका विधानामुळे त्यांच्यावर जोरदार टीका झाली होती. “माझे माध्यमांशी असलेले नाते खूप चांगले आहे. मी मीडियामुळेच आज इथे आहे. माझे वडील पत्रकार होते आणि मला मीडियाबद्दल खूप आदर आहे; पण पापाराझींशी माझा काहीही संबंध नाही. हे लोक कोण आहेत? हातात मोबाईल घेतला की, कोणाचेही फोटो काढायचे आणि काहीही बोलायचे, असे या लोकांना वाटते. ते ज्या पद्धतीच्या कमेंट्स करतात, त्यावरून त्यांचे शिक्षण आणि पार्श्वभूमी काय असेल, असा प्रश्न पडतो. सोशल मीडियावर काहीही अपलोड करता येते म्हणून हे लोक आमचे प्रतिनिधित्व करणार का?” अशा शब्दांत जया बच्चन यांनी आपला संताप व्यक्त केला होता.