Dharmendra : अभिनेते धर्मेंद्र यांना मरणोत्तर पद्म विभूषण पुरस्कार, चित्रपट सृष्टीतील योगदानाबद्दल गौरव

अभिनेते धर्मेंद्र यांना मरणोत्तर पद्मविभूषण पुरस्कार जाहीर करण्यात आला आहे. डिसेंबर महिन्यात त्यांचं निधन झालं.

Late Dharmendra Singh Deol (Posthumous) to be conferred with Padma Vibhushan

अभिनेते धर्मेंद्र यांना मरणोत्तर पद्म विभूषण पुरस्कार (फोटो-लोकसत्ता ऑनलाइन)

Dharmendra : अभिनेते धर्मेंद्र यांना त्यांच्या कला क्षेत्रातील गौरवाबद्दल पद्म विभूषण या सन्मानाने गौरवण्यात आलं आहे. धर्मेंद्र यांना हा पुरस्कार मरणोत्तर दिला जाणार आहे. चित्रपटसृष्टीतील त्यांच्या योगदानाबाबत त्यांना हा पुरस्कार जाहीर करण्यात आला आहे. धर्मेंद्र यांच्यासह शिबू सोरेन यांना राजकीय क्षेत्रातील योगदानासाठी मरणोत्तर पद्मविभूषण पुरस्कार जाहीर करण्यात आला आहे. तर महाराष्ट्राचे माजी राज्यपाल भगत सिंह कोश्यारी यांना पद्म भूषण पुरस्कार देऊन गौरव केला जाणार आहे. त्याच प्रमाणे अलका याज्ञिक यांनाही पद्म भूषण पुरस्कार दिला जाणार आहे. तर जाहिरात लेखक पियुष पांडे यांनाही मरणोत्तर पद्म भूषण पुरस्कार जाहीर करण्यात आला आहे.

देशी मातीतला हिरो म्हणजेच धर्मेंद्र

हॉलिवूडमध्ये जसा अरनॉल्ड त्याचा काळ गाजवत होता तसा आपल्याकडे आपल्या देशी मातीतला हिरो आहे ज्याचं नाव आहे धर्मेंद्र. १९६० च्या दशकात तो आला. ‘दिल भी तेरा हम भी तेरे’, ‘शोला और शबनम’, ‘अनपढ’, ‘शादी’, ‘बंदिनी’, ‘बेगाना’, ‘आयी मिलन की बेला’, ‘पुर्णिमा’, ‘फुल और पत्थर’, ‘देवर’, ‘अनुपमा’, ‘आये दिन बहार के’ या सिनेमांमधून त्याच्या अभिनयाची जादू दाखवत राहिला. ‘मेरा नाम जोकर’मधला त्याने साकारलेला सर्कसचा मालक आठवा. ‘यादो की बारात’ सिनेमातला शंकर आठवा. अजितच्या पायात ८ आणि ९ नंबरचा बूट पाहून चिडणारा. लहानपणी ताटातूट झालेल्या भावांची ओळख ‘यादो की बारात निकली है आज’ गाणारा शंकर, आपल्या भावांना, कुटुंबाला वाचवण्याची धडपड करणारा शंकर सगळ्यामध्ये धर्मेंद्र अगदी चपखल बसला आहे. ‘ड्रीम गर्ल’, ‘सीता और गीता’, ‘चुपके चुपके’ या सिनेमातल्या त्याच्या भूमिकाही खास गाजल्या. अमिताभ बच्चन, धर्मेंद्र, जया भादुरी, शर्मिला टागोर, ओमप्रकाश अशी तगडी स्टार कास्ट असलेल्या ‘चुपके चुपके’ सिनेमात धर्मेंद्रने त्याच्यात विनोदी अभिनेताही लपला आहे हे दाखवून दिलं. ऋषिकेश मुखर्जींचं दिग्दर्शन आणि इतक्या सगळ्या कलाकारांची फौज यात ओम प्रकाशची जिरवताना ‘प्यारे मोहन’ बनून त्याने जी काही धमाल केली आहे ती केवळ अविस्मरणीय. त्यांच्या या सगळ्या योगदानाचा गौरव भारत सरकारने केला आहे. त्यांना पद्म विभूषण पुरस्कार जाहीर करण्यात आला आहे.

Padma Awards | Late Dharmendra Singh Deol (Posthumous) to be conferred with Padma Vibhushan in the field of Art. pic.twitter.com/2IoKvJ8NBH

— ANI (@ANI) January 25, 2026

धर्मेंद्र यांना २०१२ मध्ये पद्म भूषण पुरस्कार मिळाला होता

धर्मेंद्र यांनी त्यांच्या कारकिर्दीत विविध शेड्स असलेल्या भूमिका साकारल्या. पण ते वंचित राहिले ते पुरस्कारांपासून त्यांना नॉमिनेशन मिळालं पण पुरस्कार मिळाला नाही. वाट्याला आले ते पुरस्कार कोणते होते? तर बेस्ट फिल्मचा पुरस्कार मिळाला घायल सिनेमाचे निर्माते म्हणून. १९९७ ला मिळाला लाईफटाईम अचिव्हमेंट पुरस्कार. १९६० ते २०२३ अशी जबरदस्त प्रदीर्घ सिनेकारकीर्द असूनही आपल्या वाटणाऱ्या धर्मेंद्रच्या वाट्याला पुरस्कार आले ते असेच. २०१२ मध्ये सिनेसृष्टीतल्या कारकिर्दीबाबत पद्म भूषण पुरस्कार देऊन त्यांना गौरवण्यात आलं. मात्र फिल्मफेअर किंवा अगदी सहाय्यक अभिनेता म्हणूनही त्याला पुरस्कार मिळाला नाही. आता त्यांना मरणोत्तर पद्म विभूषण या पुरस्काराने गौरवण्यात आलं आहे.

TOPICSधर्मेंद्र Dharmendra पद्मविभूषण Padma Bhushan बॉलिवूड Bollywood

मराठीतील सर्व बॉलीवूड बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Late dharmendra singh deol posthumous to be conferred with padma vibhushan in the field of art scj