माधुरी दीक्षितला अभिनेत्री नाही तर ‘या’ क्षेत्रात घडवायचे होते करिअर; मात्र नशिबाने उघडली सिनेविश्वाची दारे अन् झाली ‘धकधक गर्ल’

लहानपणापासून नृत्याची आवड

माधुरी दीक्षित यांचा जन्म १५ मे १९६७ रोजी मुंबईमध्ये झाला. सामान्य मराठी कुटुंबामध्ये जन्मलेली माधुरी स्वभावाने शांत असली तरी तिच्यामध्ये तेज होते. लहानपणापासून नृत्याची आवड असलेल्या माधुरीने कथक करण्यास सुरुवात केली. वयाच्या अवघ्या नवव्या वर्षी माधुरीने कथकमध्ये स्कॉलरशिप मिळवली होती.

बॉलीवूडमध्ये डान्सरमधून विशेष ओळख

बाळाचे पाय पाळण्यात दिसतात, त्याप्रमाणे माधुरीने तिच्या नृत्यकौशल्याने लहानपणापासून सर्वांचे लक्ष वेधले होते. पुढे बॉलीवूडमध्ये काम करताना माधुरीने जितके अभिनेयातून प्रेक्षकांची मने जिंकली, तितकीच ती तिच्या डान्ससाठी ओळखली गेली. अभिनय, नृत्य आणि तिने साकारलेल्या विविध भूमिका यामुळे माधुरी बॉलीवूडमधील यशस्वी अभिनेत्री ठरली.

माधुरी दीक्षित लहानपणापासून नृत्य शिकत असली तरी त्या अभ्यासातही हुशार होती. शालेय शिक्षणामध्ये त्यांनी चांगली कामगिरी केली होती. तसेच पुढे त्यांनी पार्ले कॉलेजमध्ये मायक्रोबायोलॉजी विषयात पदवी शिक्षणासाठी प्रवेश घेतला होता. मात्र नशीबाने माधुरी दीक्षित यांच्या नशिबी शैक्षणिक नाही तर कला आणि अभिनय विश्वातील उज्ज्वल यश लिहिले होते. शिक्षणामध्ये रुची असलेल्या माधुरीला सिनेमांमुळे शिक्षण सोडावे लागले. तिला पुढे आणखी शिक्षण घ्यायचे होते. माधुरी दीक्षितला अभिनेत्री नाही तर पॅथोलॉजिस्ट व्हायचे होते. मात्र तिच्या नशिबात सिनेविश्वात स्वतंत्र्य ओळख निर्माण करणे लिहिले होते.

‘तेजाब’ आणि त्यानंतर ‘राम लखन’ या चित्रपटाने माधुरी दीक्षितला बॉलिवूडची दिग्गज आणि लोकप्रिय अभिनेत्री बनवले. १९९२ सालच्या ब्लॉकबस्टर चित्रपट ‘बेटा’मधील ‘धक धक करने लगा’ गाण्याने माधुरीला वेगळ्याच उंचीवर नेले. या प्रसिद्ध गाण्यामुळे माधुरी दीक्षितला ‘धक धक गर्ल’ असे नाव मिळाले. या गाण्यातील तिच्या अप्रतिम नृत्य शैलीने आणि मनमोहक अदाकारीने तिला एका रात्रीत स्टार बनवले.

दरम्यान, माधुरी दीक्षितचा चाहतावर्ग मोठा आहे. तिच्या वाढदिवसानिमित्त चाहते सोशल मीडियावर तिच्यावर शुभेच्छांचा वर्षाव करताना दिसत आहेत.