“मी त्याच्यासाठी खूप…”, अक्षय खन्नाबद्दल माधुरी दीक्षित म्हणाली, “तो आजही…”

धुरंधर सिनेमात सारा अर्जुन, आर. माधवन, रणवीर सिंह, अक्षय खन्ना, संजय दत्त, अर्जुन रामपाल, राकेश बेदी आणि असे अनेक कलाकार महत्त्वाच्या भूमिकांमध्ये दिसत आहेत. आदित्य धर चित्रपटात अक्षय खन्नाने रेहमान डकैत ही भूमिका साकारली आहे.

अक्षय खन्नाच्या या भूमिकेचे सर्व स्तरावर कौतुक होत असल्याचे दिसत आहे. राग, आनंद, द्वेष असो वा त्याचा उत्साह अक्षयने त्याच्या भूमिकेला पूरेपूर न्याय दिल्याचे पाहायला मिळत आहे. त्याच्या डान्सचेदेखील कौतुक होत असल्याचे दिसत आहे. सोशल मीडियावर अक्षय खन्नाच्या डान्सचे व्हिडीओ व्हायरल होत असून नेटकरीही त्यावर आता रील्स बनवत आहेत.

अक्षय खन्नाबद्दल माधुरी दीक्षित म्हणाली…

या सगळ्यात बॉलीवूडची धकधक गर्ल माधुरी दीक्षितने नुकत्याच दिलेल्या मुलाखतीत अक्षय खन्नाबद्दल वक्तव्य केले आहे. माधुरी दीक्षितने सुभोजित घोष या यूट्यूब चॅनेलला मुलाखत दिली. या मुलाखतीत तिला विचारले की, सध्या धुरंधर चित्रपट चांगली कमाई करत आहे. अक्षय खन्नांचे खूप कौतुक होत आहे, लोक त्यांच्यावर प्रेमाचा वर्षाव करत आहेत, तुम्ही त्यांच्याबरोबर काम केले आहे. अक्षय खन्नांसारखा कलाकार सध्या यशस्वी होताना दिसत आहे, ते पाहून तुमच्या मनात काय भावना आहेत?

या प्रश्नाचे उत्तर देताना माधुरी दीक्षित म्हणाली, “मी त्याच्यासाठी खूप आनंदी आहे. तो उत्तम अभिनेता आहे. त्याने अनेक चित्रपटांमध्ये खूप चांगले काम केले आहे. मी त्याच्याबरोबर काम केले आहे, त्यावेळी तो चित्रपटसृष्टीत नवीनच होता. त्यावेळी मी स्टार होते, मी अनुभवी होते. तो चित्रपट त्याच्या कारकिर्दीतील सुरुवातीच्या काही चित्रपटांपैकी एक होता. पण, नवीन असूनही तो खूप चांगले काम करत होता.”

“ते पाहताना खूप आनंद…”

“त्याची ज्या पद्धतीने प्रगती होत आहे, ते पाहताना खूप आनंद होत आहे. तो त्यावेळीही चांगले काम करत होता आणि तो आजही चांगले काम करत आहे. मी खूप आनंदी आहे”, असे म्हणत अक्षय खन्नाचे यश पाहून आनंद होत असल्याचे माधुरीने सांगितले.

अक्षय खन्ना आणि माधुरी दीक्षित यांनी ‘मोहब्बत’ या चित्रपटात एकत्र काम केले होते. १९९७ ला हा चित्रपट प्रदर्शित झाला होता. त्यानंतर त्यांनी २००७ ला ‘आजा नचले’ या चित्रपटात एकत्र काम केले होते.

दरम्यान, माधुरी दीक्षित लवकरच ‘मिसेस देशपांडे’ या वेब सीरिजमधून प्रेक्षकांच्या भेटीला येणार आहे. तिची ही भूमिका तिच्या इतर भूमिकांहून वेगळी आहे; तर अक्षय खन्ना लवकरच ‘महाकाली’ चित्रपटात दिसणार आहे. तो या चित्रपटात शुक्राचार्य ही भूमिका साकारणार आहे.