‘भारत दिवाळखोरीच्या उंबरठ्यावर…’, RBI ‘त्या’ गव्हर्नरची कथा आता मोठ्या पडद्यावर; चिन्मय मांडलेकरने केलंय दिग्दर्शन

५७ व्या वाढदिवसानिमित्त (२३ एप्रिल) मनोज बाजपेयी यांच्या आगामी चित्रपटाचे पोस्टर शेअर करण्यात आले आहे. निर्माते विपुल अमृतलाल शाह यांनी या चित्रपटाचे दोन पोस्टर्स शेअर केले असून, या दोन्ही पोस्टर्सनी प्रेक्षकांचे लक्ष वेधले आहे. मनोज बाजपेयी यांच्या या आगामी चित्रपटाचे नाव आहे ‘गव्हर्नर: द सायलेंट सेविअर’.

सोशल मीडियावर नुकतेच या चित्रपटाचे पोस्टर शेअर करण्यात आले आहे. या शेअर करण्यात आलेल्या पहिल्या पोस्टरमध्ये एका हिरव्या रंगाच्या खुर्ची दिसत आहे. त्यावर ‘भारत दिवाळखोरीच्या उंबरठ्यावर आहे’ आणि ‘ही फक्त खुर्ची नाही… जबाबदारी आहे’, अशा ओळी लिहिल्या आहेत.

तसेच, दुसऱ्या पोस्टरमध्ये मनोज बाजपेयी पाठमोरे उभे असून ते एका कॉरिडॉरमधून चालताना दिसत आहेत. यात ते सूट-बूटमध्ये असून त्यांच्या हातात एक सुटकेससुद्धा आहे. या पोस्टरवर ‘जर मी हरलो… तर भारत हरेल’, अशी एक ओळ पहायला मिळत आहे. त्याचबरोबर पोस्टरवर रिझर्व्ह बँक ऑफ इंडियाचा लोगोसुद्धा पहायला मिळत आहे. पोस्टरवरून चित्रपटाचा विषय देशाच्या अर्थव्यवस्थेवर आधारित असल्याचे दिसत आहे. दरम्यान, दोन्ही पोस्टर्स आणि शीर्षकामुळे चित्रपटाबद्दलची उत्कंठा चांगलीच वाढली आहे.

विपुल शाह हे ‘गव्हर्नर’ या चित्रपटाचे निर्माते आहेत. तर चित्रपटाचे दिग्दर्शन मराठमोळा दिग्दर्शक चिन्मय मांडलेकरने केलं आहे. ‘इन्स्पेक्टर झेंडे’ या चित्रपटात मनोज बाजपेयी आणि चिन्मय मांडलेकर यांनी एकत्र काम केले होते. त्यानंतर आता दोघे ‘गव्हर्नर’ चित्रपटानिमित्त पुन्हा एकदा एकत्र आले आहेत.

View this post on Instagram

A post shared by Sunshine Pictures (@sunshinepicturesofficial)

काही दिवसांपूर्वी चिन्मयने कॅचअपला दिलेल्या मुलाखतीत या चित्रपटाबद्दल सांगितले होते की, “डिसेंबर १९९० पासून ते साधारण जुलै १९९१ या सहा महिन्यांच्या कालखंडावर आधारित ‘गव्हर्नर’ चित्रपट आहे. चंद्रशेखर यांचं सरकार होतं, मग ते पडलं. त्याचदरम्यान राजीव गांधी यांची हत्या झाली. मग निवडणूक झाली. त्यानंतर नरसिंहराव पंतप्रधान झाले आणि डॉ. मनमोहन सिंह अर्थमंत्री झाले. मग जागतिकीकरण, खाजगीकरण आणि उदारीकरण झालं. त्या सगळ्या कालखंडावर आधारित हा चित्रपट आहे. हा अर्थशास्त्रावरचा चित्रपट आहे. यात कुणीही व्हिलन नाही, कुठला अॅक्शन सीक्वेन्स नाही. पण तरी तो थ्रिलर चित्रपट आहे.”

दरम्यान, ‘गव्हर्नर: द सायलेंट सेविअर’निमित्ताने विपुल शाह आणि मनोज बाजपेयी पहिल्यांदाच एकत्र काम करत आहेत. मनोज बाजपेयींचा ‘गव्हर्नर: द सायलेंट सेविअर’ चित्रपट येत्या १२ जून रोजी प्रदर्शित होणार आहे.