“मी मृत्युंजय मंत्र…”, प्रियांका चोप्राने सांगितला मुलीच्या जन्माचा कठीण काळ; म्हणाली, “११० दिवस…”

आता अभिनेत्रीने नुकत्याच केलेल्या वक्तव्यामुळे चर्चेत आहे. तिने जय शेट्टीला मुलाखत दिली. या मुलाखतीत तिने, “मुलगी मालती मेरीचा जन्म झाला, तेव्हा तो काळ कठीण होता”, असे सांगितले.

ती या मुलाखतीत म्हणाली, “आमच्यासाठी तो संपूर्ण अनुभवच खूप कठीण होता. मी यावर बोलण्यासाठी तयार आहे की नाही, हे मला माहीत नाही; पण तो काळ कठीण होता. मालती आमच्यासाठी चमत्कारासारखी आहे.”

“ती २७ आठवड्यांत जन्माला…”

पुढे ती म्हणाली, “जेव्हा आम्हाला सांगितलं गेलं की, ती २७ आठवड्यांत जन्माला येणार आहे, तेव्हा मी खूप घाबरले होते. मला आठवतं, मी आमच्या घरातल्या फायरप्लेससमोर किमान नऊ तास बसून होते. मी कायम समस्या आल्यावर उपाय शोधते; पण त्या क्षणी मला काहीच सुचत नव्हतं. त्यावेळी निक कुठेतरी गेला होता. तो परत आल्यानंतर त्यानं मला धीर दिला. त्यानंतर आम्ही दवाखान्यात गेलो.”

“मालतीचा जन्म ज्या परिस्थितीत झाला, तो काळ सर्वांसाठी तणावपूर्वक होता. तो कोविडचा काळ होता. त्यामुळे काळजी वाटत होती. तिचा जन्म झाला तेव्हा ती खूप लहान दिसत होती. तसेच ती जांभळ्या रंगाची दिसत होती. सुदैवानं जी सरोगेट होती, तिची प्रकृती चांगली होती. त्यामुळे आम्ही मालतीकडे लक्ष देऊ शकलो. पण, परिस्थिती अशी होती की, काहीच सुचत नव्हतं. मी सुन्न झाले होते. तिला एनआयसीयू (NICU) मध्ये ठेवले होते. आम्ही तिथे गेलो. तिथे एका वेळी एकाच व्यक्तीला जाण्याची परवानगी होती. जेव्हा ती पहिल्यांदा रडली तेव्हा तिचा आवाज मांजरासारखा होता. तो काळ भावनिकदृष्ट्या फारच त्रासदायक होता.”

प्रियांका चोप्रा असेही म्हणाली की, मालतीच्या जन्माबद्दल आम्हाला जाहीर करायचे नव्हते; पण काहींना ती गोष्ट समजली होती. आम्हाला मेसेज आला होता की, जर आम्ही ही बातमी जाहीर केली नाही. तर आम्ही ती बातमी प्रसिद्ध करू. त्यामुळे आम्हाला मालतीच्या जन्माबद्दलची माहिती जाहीर करावी लागली. त्यावेळी तिच्या जन्माबद्दल आम्ही सांगण्यास तयार नव्हतो.कारण- तिच्याबाबत पुढे काय होईल किंवा ती कशी असेल, याबद्दल आम्हाला काहीच कळत नव्हतं.”

याच मुलाखतीत प्रियांका चोप्राने असेही सांगितले की, मालतीला एनआयसीयूमध्ये जवळजवळ ११० दिवस ठेवावे लागले होते. आम्ही दररोज रुग्णालयात असायचो. निक तिच्यासाठी गिटार वाजवत असे, गाणी गात असे. तर प्रियांका तिच्या छोट्या आयपॉडवर मंत्र लावत असे. मी महामृत्युंजय मंत्र, गायत्री मंत्र, ॐ नमः शिवाय हे मंत्र कमी आवाजात लावून, तिच्या पाळण्यात ठेवत असे. तिचे सहा वेळा ब्लड ट्रान्सफ्युजन केलं.

ती असेही म्हणाली, “मालती घरी आली तो दिवस अत्यंत भावनिक होता. ती घरी आली तेव्हाही ती खूप लहान होती. आम्ही सर्व जण म्हणून मंदिरासमोर बसलो होतो. त्या वेळी मी पहिल्यांदा खूप रडले. ती वाचली यासाठी देवाचे आभार मानले.”

तसेच, प्रियांका निकचे कौतुक करीत असेही म्हणाली की, मी योग्य व्यक्तीबरोबर, एका चांगल्या वडिलांबरोबर आणि आमच्या बाळाबरोबर जीवन जगत आहे, याचा मला अभिमान आहे. दरम्यान, २०२२ मध्ये सरोगसीद्वारे प्रियांका आणि निकच्या मुलीचा जन्म झाला होता.