यशाच्या शिखरावर असताना उद्योजकाशी लग्न करून सोडला देश, आता काय करते सलमान खानची हिरोईन? वाचा…

९० च्या दशकातील बॉलिवूडची प्रसिद्ध अभिनेत्री रंभा (Rambha) हिचा आज ५० वा वाढदिवस आहे. सलमान खानच्या ‘जुडवा’ चित्रपटातील भूमिकेमुळे घराघरात पोहोचलेली रंभा आता बॉलिवूडच्या झगमगाटापासून आणि ग्लॅमरच्या जगापासून पूर्णपणे दूर गेली आहे. ती सध्या कुठे आहे, काय करते आणि तिने अचानक अभिनय का सोडला, असे अनेक प्रश्न चाहत्यांना पडले आहेत. एका रिपोर्टनुसार, रंभा आता चित्रपटसृष्टी सोडून कॅनडामध्ये स्थायिक झाली आहे. तिने २०१० मध्ये व्यावसायिक इंद्र कुमार पद्मनाथन यांच्याशी लग्न केले असून, आता ती आपल्या ३ मुलांच्या संगोपनात आणि कौटुंबिक आयुष्यात व्यस्त आहे. सोशल मीडियावर सक्रिय असणारी रंभा अनेकदा आपल्या कुटुंबासोबतचे फोटो शेअर करत असते.

कॅनडामध्ये राहते रंभा

‘टाइम्स ऑफ इंडिया’च्या एका रिपोर्टनुसार, रंभा आता फिल्म इंडस्ट्रीच्या झगमगाटापासून दूर कॅनडामध्ये राहते. ग्लॅमरच्या जगापासून दूर राहून ती आता आपल्या मुलांचं संगोपन करत आहे. रंभाने करिअरमध्ये यशाच्या शिखरावर असताना, उद्योजक इंद्र कुमार पद्मनाथन यांच्याशी लग्न केलं. २०१० मध्ये तिरुमला मंदिरात या दोघांनी लग्नगाठ बांधली होती. रंभाला लावण्या पद्मनाथन, साशा पद्मनाथन आणि शिविन पद्मनाथन अशी तीन अपत्ये आहेत. सध्या ही अभिनेत्री आपला संपूर्ण वेळ आपल्या मुलांच्या संगोपनात घालवत आहे.

रंभाचं मूळ नाव काय?

५ जून १९७६ रोजी आंध्र प्रदेशातील विजयवाडा येथे रंभाचा जन्म झाला. तिचं खरं नाव विजयलक्ष्मी आहे, पण ती रंभा या नावानेच ओळखली जाते. तिने १९९२ मध्ये आलेल्या ‘आ ओकट्टी अडक्कु’ या तेलुगू चित्रपटातून आपल्या करिअरची सुरुवात केली होती. त्यानंतर १९९५ मध्ये ‘जल्लाद’ चित्रपटातून तिने बॉलीवूडमध्ये पदार्पण केलं होतं. रंभाने तिच्या करिअरमध्ये अनिल कपूर, रजनीकांत, सलमान खान, अजय देवगन, मिथुन चक्रवर्ती आणि गोविंदा यांसारख्या बड्या सुपरस्टार्सबरोबर काम केले आहे.

रंभा आता चित्रपटांपासून दूर असली, तरी ती सोशल मीडियावर खूप सक्रिय आहे. ती चाहत्यांबरोबर वैयक्तिक आयुष्यातील अनेक अपडेट्स शेअर करत असते. ती अनेकदा इन्स्टाग्रामवर आपल्या कुटुंबाबरोबरचे फोटो पोस्ट करते. सलमान खानची ही को-स्टार आता चंदेरी दुनियेपासून दूर आपल्या कुटुंबाबरोबर आनंदाने वेळ घालवतेय.