रणवीर सिंहच्या ‘धुरंधर २’ने रिलीजपूर्वीच परदेशात कमावले लाखो रूपये, रश्मिका मंदाना-रणबीर कपूरच्या ‘अ‍ॅनिमल’चा मोडणार रेकॉर्ड? घ्या जाणून…

आदित्य धरच्या ‘धुरंधर’ने जवळपास दोन महिने बॉक्स ऑफिसवर धुमाकूळ घालत कोट्यवधींचा गल्ला जमावलेला. जगभरातही या सिनेमाने कोट्यवधी कमवत अनेक रेकॉर्डस् मोडले. ‌त्यामुळे आता ‘धुरंधर २’सुद्धा बॉक्स ऑफिसवर अशीच कमाई करणार, अशी अपेक्षा असतानाच या चित्रपटाने प्रदर्शनापूर्वीच लाखो कमावले असल्याची माहिती समोर आली आहे. महत्त्वाची बाब म्हणजे ‘धुरंधर २’साठी आता मार्ग मोकळा झाला आहे. म्हणजेच १९ मार्चला ‘टॉक्सिक’ व ‘धुरंधर २’ असे दोन चित्रपट प्रदर्शित होणार होते. परंतु, आता दाक्षिणात्य अभिनेता यशच्या ‘टॉक्सिक’ चित्रपटाच्या प्रदर्शनाची तारीख बदलण्यात आली आहे.

‘धुरंधर २’ने परदेशात किती कमावले?

‘टॉक्सिक’ची प्रदर्शनाची तारीख बदलल्यामुळे एकट्यालाच प्रदर्शनाचा फायदा मिळणार असल्याने ‘धुरंधर २’च्या उत्तर अमेरिकेमध्ये प्री-सेल्स वेगाने वाढत आहेत आणि प्रदर्शित होण्याच्या दोन आठवडे आधीच चित्रपटाने $100K पेक्षा जास्त कमाई केली आहे. ‘धुरंधर’च्या सीक्वेलने प्रदर्शनापूर्वी किती कमाई केली आहे याबद्दल सविस्तर जाणून घेऊयात…

बुधवारी सॅकनिल्कच्या अहवालानुसार ‘धुरंधर २’ चित्रपटाने प्री-सेलमध्ये आधीच $100K (सुमारे ८३ लाख रुपये) कमावले आहेत. त्यामध्ये १८ मार्चला होणाऱ्या प्रीमियर शोमधून $70K कमाई झाली आहे. हा चित्रपट अजून सर्व चित्रपटगृहे आणि सर्व ठिकाणी प्रदर्शित झालेला नाही; पण पुढच्या काही आठवड्यांत तो प्रदर्शित होईल. त्यामुळे निर्मात्यांचे फक्त प्रीमियर शोमधूनच $1 मिलियन (सुमारे ८.३ कोटी रुपये) कमावण्याचे लक्ष्य आहे.

‘धुरंधर २’ मोडणार रणबीर कपूरच्या ‘अॅनिमल’चा रेकॉर्ड?

सध्या अमेरिकेत भारतीय चित्रपटांच्या सर्वांत मोठ्या प्रीमियरचा रेकॉर्ड रणबीर कपूरच्या ‘अॅनिमल’ चित्रपटाकडे आहे. संदीप रेड्डी वांगा दिग्दर्शित या चित्रपटाने २०२३ मध्ये $1.2 मिलियन कमाई केली होती. ‘धुरंधर 2’ हा चित्रपट हा रेकॉर्ड मोडण्याची शक्यता आहे.

‘धुरंधर’चा पहिला भाग उत्तर अमेरिकेत खूप मोठा हिट ठरला. अमेरिकेत आणि कॅनडामध्ये मिळून त्याने $20 मिलियनपेक्षा जास्त कमाई केली.’धुरंधर’ने ‘बाहुबली २’ या चित्रपटालाही मागे टाकून अमेरिकेत सर्वाधिक कमाई करणारा भारतीय चित्रपट होण्याचा विक्रम केला. सध्या चित्रपटासाठी असलेल्या उत्साहामुळे ‘धुरंधर २’देखील तितकेच मोठे यश मिळवेल, अशी अपेक्षा केली जात आहे.

दरम्यान, ‘धुरंधर’च्या कमाईबद्दल बोलायचे झाले, तर धुरंधर हा २०२५ मधील ब्लॉक बस्टर चित्रपटांपैकी एक ठरला. या चित्रपटाने आतापर्यंत बॉक्स ऑफिसवर अनेक सुपरहिट भारतीय चित्रपटांचे रेकॉर्ड मोडत, जगभरात १३०० कोटींची कमाई केली आणि जगभरात इतकी कमाई करणारा दुसरा भारतीय चित्रपट ठरला.