“मी १८-१९ वर्षांची असतानाच…”, सैफ अली खानच्या बहिणीने केलं नाही लग्न, बॉलीवूडपासून दूर सबा अली खान काय करते?

सबा अली खान म्हणाली, “माझा कोणताही बॉयफ्रेंड नव्हता. मी १८-१९ वर्षांची असतानाच लग्नासाठी बऱ्याच लोकांना भेटले होते, पण मी कोणाशीच लग्न केलं नाही. १९ व्या वर्षी कोलकाता येथील एका मुलाशी माझं लग्न जवळजवळ ठरणारच होतं. आमची एकमेकांशी माझी ओळख करून देण्यात आली होती. पण ते लग्न काही ठरलं नाही, कारण मी त्या वेळी खरोखरच लग्नासाठी तयार नव्हते.”

मनासारखा जोडीदार मिळाला नाही – सबा अली खान

सबाने सांगितलं की नंतरच्या काळात ती लग्नासाठी तयार होती, पण तिला आवडेल असा जोडीदार मिळाला नाही. “मला कम्पॅटिबल असा कोणताही जोडीदार मिळाला नाही. आणि अब्बांसारखे वडील असल्यानंतर…खरं तर माझे वडील एक उत्तम व्यक्ती होते. त्याचा अर्थ अगदी त्यांच्यासारखाच मुलगा मला हवा होता असं नाही, कारण वडील हे शेवटी वडीलच असतात,” असं सबा अली खान म्हणाली.

सबा अली खानला कसा जोडीदार हवा होता?

आपल्या भावी जोडीदाराकडून काय अपेक्षा होत्या? त्याबद्दल सबा म्हणाली, “मला करिश्माई, नम्र आणि जबाबदार जोडीदार हवा होता. तापसी पन्नूने एकदा म्हटलं होतं की, ‘मला मुलगा नकोय, एक प्रौढ-समंजस पुरुष हवा आहे.’ तिचं हे वाक्य मला खूप पटले होते. पण दुर्दैवाने मला तशी व्यक्ती मिळालीच नाही.”

दरम्यान, सैफ अली खानच्या घरी प्रत्येक कार्यक्रमाला व सणाला सबा उपस्थित असते. सबाचं सैफ व अमृता सिंहची मुलं सारा अली खान व इब्राहिम अली खान यांच्याशीही चांगलं नातं आहे. ती कुटुंबियांबरोबरचे अनेक फोटो पोस्ट करत असते. त्याचबरोबर सबाचं वहिनी करीना कपूरशीही खास बाँडिंग आहे.