“मला आश्चर्य…”, शबाना आझमी मूल नसण्याबद्दल काय म्हणालेल्या? सावत्र मुलांबद्दलही केलेलं वक्तव्य

शबाना आझमी यांनी २००० साली सिमी ग्रेवालला मुलाखत दिली होती. त्या मुलाखतीत स्वावलंबी महिलेसाठी लग्नाचे महत्त्व काय? असा प्रश्न शबाना आझमींना विचारण्यात आला होता. आपल्याला मुलं नसल्याने गोष्ट वेगळी होती, असं शबाना म्हणाल्या होत्या. “मुलं न होऊ शकल्याने माझ्यासाठी काही गोष्टींची निवड करणं खूप सोपं झालं, कारण मी माझा जास्त वेळ कामासाठी देऊ शकले. माझ्यामते, मातृत्वात स्त्रीचा खूप कस लागतो,” असं मत शबाना आझमींनी व्यक्त केलं होतं.

बाळ होणार नाही हे मी सहजपणे स्वीकारलं – शबाना आझमी

आई होऊ शकत नाही हे कळाल्यावर निराशा झाली होती का, असं विचारल्यावर शबाना म्हणालेल्या, “नाही. खरं तर मलाही हे पाहून आश्चर्य वाटलं होतं, कारण सुरुवातीला मला विश्वासच बसत नव्हता की मी आई होणार नाही. मला खात्री होती की मी इतकी खास आहे की हा देवाने मला दिलेला अधिकार आहे. पण तरीही बाळ होणार नाही हे मी किती सहजपणे स्वीकारले हे पाहून मला आश्चर्य वाटलं. जेव्हा मला समजलं की आपल्याला मुलं होऊ शकत नाहीत, त्यामुळे मी त्याचा फार विचार करून स्वतःला त्या गोष्टीसाठी दुःखी होऊ दिलं नाही. मी त्या टप्प्यातून पुढे जायचं ठरवलं कारण मी करू शकलेल्या इतर अनेक गोष्टींसाठी मी खूप आभारी होते.”

मूल दत्तक घेण्याबाबत शबाना आझमींचं मत

“मला कधीही मूल दत्तक घ्यायचे नव्हते. कधीच नाही.” कारण विचारल्यावर त्यांनी फरहान आणि झोयाची नावं घेतली. “माझी जावेदच्या मुलांशी खूप चांगली मैत्री आहे, त्यामुळे ती गरज पूर्ण झाली. ते मोठे झाले आहेत, त्यामुळे मला त्यांचे कपडे बदलायची किंवा त्यांच्या मलेरियाबद्दल काळजी करण्याची गरज नाही. ती हुशार मुलं आहेत ज्यांच्याशी मी विविध विषयांवर चर्चा करते. ते आपली मतं ठामपणे माझ्यासमोर मांडतात. त्यांच्यामध्ये नवीन कल्पना येताना तुम्ही पाहू शकता. या वयोगटातील मुलं मला खूप आवडतात,” असं शबाना म्हणाल्या होत्या.