Video: स्वरा भास्करच्या पतीला मुंबई पोलिसांनी घेतलं ताब्यात; अभिनेत्री म्हणाली, “अतिशय लाजीरवाणी गोष्ट…”

सोमवारी संध्याकाळी स्वराने काही व्हिडीओ शेअर केले आहेत. त्यापैकी एका व्हिडीओमध्ये पोलीस फहादला घेऊन जाताना दिसत आहेत. यामध्ये फहाद पोलिसांना “मला अटक का करत आहात?” असा प्रश्न विचारताना ऐकू येतो. हा व्हिडिओ सोमवारी दुपारी ४:३० च्या सुमारास रेकॉर्ड करण्यात आल्याचं स्वराने सांगितलं.

पाहा स्वरा भास्करने पोस्ट केलेले व्हिडीओ

हा व्हिडीओ शेअर करत स्वराने लिहिलं, “मुंबई पोलिसांनी २० जुलै २०२६ रोजी दुपारी ४:३० वाजता मुंबईतील चैत्यभूमीवरून फहाद अहमद आणि इतर आंदोलकांना ताब्यात घेतलं आहे. सध्या त्यांना माहीम पोलीस ठाण्यात ठेवण्यात आलंय. ही भारताच्या लोकशाहीसाठी ही अतिशय लाजीरवाणी गोष्ट आहे.”

स्वराने आधी आणखी एक व्हिडीओ शेअर केला होता, त्यात फहाद पोलिसांच्या गाडीत बसून व्हिडीओ रेकॉर्ड करताना दिसतोय. तसेच त्याच्याबरोबर काय घडलं हे तो व्हिडीओत सांगतोय. “मला फहादने २० जुलै २०२६ रोजी दुपारी ४:३० वाजता हा व्हिडीओ पाठवला. त्याने मला हा पोस्ट करायला सांगितला होता. मुंबई पोलीस चैत्यभूमीवर शांततापूर्ण आंदोलन करणाऱ्यांवर हल्ला करत आहेत. जे लोक या आंदोलनाला पाठिंबा देत आहेत, त्यांनी कृपया शांततेत आणि मोठ्या संख्येने चैत्यभूमीवर पोहोचावं,” असं स्वरा भास्करने व्हिडीओ शेअर करत लिहिलं.

कॉक्रोच जनता पार्टीच्या आंदोलनाला पाठिंबा देण्यासाठी चैत्यभूमीवर जमलेल्या आंदोलकांना सोमवारी मुंबई पोलिसांनी ताब्यात घेतलं, काही आंदोलक जखमी झाले, अशी माहिती सूत्रांच्या हवाल्याने इंडिया टुडेने दिली आहे.