सलग ५ चित्रपट फ्लॉप, आता बॉलीवूडमधील सर्वात श्रीमंत माणूस; तब्बल १३,३१४ कोटींचा मालक, शाहरुख खानलाही टाकलं मागे

रॉनीने चित्रपटसृष्टीतील त्याच्या पदार्पणाची आठवण सांगितली. निर्माता म्हणून रॉनीचा पहिला चित्रपट ‘दिल के झरोके में’ (१९९७) बॉक्स ऑफिसवर सपशेल आदळला होता. मनीषा कोईराला, मामिक सिंग आणि विकास भल्ला यांच्या प्रमुख भूमिका असलेल्या या चित्रपटाची निर्मिती रॉनी आणि त्याची पत्नी झरिना यांनी ‘यूटीव्ही मोशन पिक्चर्स’ या बॅनरखाली केली होती.

करिअरमधील सर्वात मोठा फ्लॉप चित्रपट

“तो चित्रपट खूप मोठा फ्लॉप ठरला होता. त्या चित्रपटात एक सीन होता, ज्यात नाग दूध पितो. सहसा, शूटिंगच्या वेळी नाग दूध पीत नाहीत, पण आमच्या चित्रपटातील नागाने दूध प्यायले. हे पाहून दिग्दर्शक म्हणाला की, नाग दूध प्यायल्यामुळे चित्रपट सुपरहिट होईल. ‘तुम्ही निश्चिंत राहा.’ पण तो चित्रपट माझ्या करिअरमधील सर्वात मोठा फ्लॉप ठरला,” असं रॉनी म्हणाला.

‘प्लॅन बी’ नव्हता – रॉनी स्क्रूवाला

सलग पाच सिनेमे फ्लॉप होऊनही रॉनी काम करत राहिला. त्याबद्दल विचारल्यावर तो म्हणाला की त्याच्याकडे ‘प्लॅन बी’ नव्हता. “इतरांचे अनुकरण करण्यापासून ते ‘मी इतरांपेक्षा वेगळा आहे’ इथपर्यंतचा प्रवास हा माझ्यासाठी एक शिकण्याचा अनुभव होता. मला स्वतःमध्ये बदल करण्याची गरज नव्हती. मी जे बनण्याचा प्रयत्न करत होतो, ते थांबवून मला नेहमी जे बनायचं होतं ते स्वीकारण्याची गरज होती. जेव्हा आम्ही मीडिया व्यवसाय आणि चॅनेल्स सुरू केले, तेव्हा ते आम्हाला हवं तसं आम्ही केलं. पण चित्रपटांच्या बाबतीत, सगळं माझ्या आवाक्याबाहेरचं होतं, म्हणून मी इतरांचे अनुकरण करत होतो. शेवटी मला जे हवंय ते करायचं मी ठरवलं,” असं रॉनीने सांगितलं. रॉनीची घरची परिस्थिती फार चांगली नव्हती. त्यामुळे वडील आर्थिक मदत करू शकणार नाही, याची जाणीव त्याला होती.

तीन चित्रपट एकाच वेळी करायचं ठरवलं – रॉनी स्क्रूवाला

रॉनीने पुढे सांगितलं की यूटीव्हीने ‘लक्ष्य’, ‘स्वदेस’ आणि ‘रंग दे बसंती’ हे तिन्ही चित्रपट करायचं ठरवलं. यापैकी कोणता चित्रपट यशस्वी होईल, याची त्यांना काहीच कल्पना नव्हती. “आम्हाला काहीतरी वेगळं करायचं होतं. आम्हाला कथा वेगळ्या पद्धतीने सांगायच्या होत्या. आम्हाला तरुण प्रतिभावान लोक हवे होते. आम्हाला नवीन दिग्दर्शकांशी बोलायचं होतं. फक्त कास्टिंगबद्दल विचार करणारे किंवा हे मला येतं असं म्हणणारे लोक नको होते. आम्ही कलाकारांऐवजी कथेला प्राधान्य द्यायचं ठरवलं,” असं रॉनी स्क्रूवालाने नमूद केलं.

हृतिक रोशन-प्रीती झिंटाचा ‘लक्ष्य’ आणि आशुतोष गोवारीकर दिग्दर्शित शाहरुख खान-गायत्री जोशीचा ‘स्वदेस’ यांसारखे सलग पाच चित्रपट फ्लॉप झाले. तरीही रॉनी स्क्रूवालाने ‘डी’ आणि ‘मैं, मेरी पत्नी और वो’ यांसारखे लहान चित्रपट करून हळूहळू आपले स्थान निर्माण करण्यास सुरुवात केली. शेवटी ‘रंग दे बसंती’मुळे झरिना आणि यूटीव्हीचं इंडस्ट्रीत नाव झालं.

रॉनीने UTV नंतर RSVP मूव्हीजची स्थापना केली. याअंतर्गत त्याने लस्ट स्टोरीज, उरी: द सर्जिकल स्ट्राइक, रात अकेली है, पावा कधैगल, लस्ट स्टोरीज २, सॅम बहादूर, उल्लोजुक्कू आणि रात अकेली है: द बन्सल मर्डर्स यांसारख्या सुपरहिट चित्रपटांची निर्मिती केली आहे. हुरुन इंडिया रिच लिस्ट २०२५ मध्ये रॉनी १.५ बिलियन डॉलर्स (सुमारे १३,३१४ कोटी रुपये) संपत्ती असणारा बॉलीवूडमधील सर्वात श्रीमंत निर्माता ठरला. रॉनीने संपत्तीच्या बाबतीत बॉलीवूडचा बादशाह शाहरुख खान (संपत्ती – १२,४९० कोटी रुपये) यालाही मागे टाकलं.