‘रणवीर सिंहच्या ‘धुरंधर’चे प्रदर्शन स्थगित करा’; दिवंगत मेजर मोहित शर्मा यांचे पालक दिल्ली उच्च न्यायालयात

हा चित्रपट दिवंगत मेजर मोहित शर्मा यांच्या जीवनावर आणि लष्करातील त्यांच्या कारकिर्दीवर आधारित आहे. निर्मात्यांनी चित्रपट बनवण्यापूर्वी परवानगी घेतली नाही किंवा कुटुंबातील कोणत्याही सदस्याशी याबाबत चर्चा केली नाही, असे या याचिकेत म्हटले आहे.

याचिकेत पुढे असा दावा करण्यात आला आहे की मेजर मोहित शर्मा यांच्या जीवनातील महत्त्वाच्या घटना, जसे की दहशतवादविरोधी कारवाया ट्रेलरमध्ये प्रतिबिंबित झाल्या आहेत. त्यामुळे कलम २१ अंतर्गत शहीदांच्या मरणोत्तर व्यक्तिमत्त्वाच्या अधिकारांचे तसेच सन्मान आणि गोपनीयतेच्या अधिकाराचे उल्लंघन होते.

बार अँड बेंचने दिलेल्या वृत्तानुसार, याचिकाकर्त्यांनी असाही दावा केला आहे की मेजर शर्मा हे व्यावसायिक वस्तू नाहीत. त्यामुळे सत्य, प्रतिष्ठा आणि योग्य परवानगीशिवाय त्यांचे जीवन पडद्यावर नफा कमावण्याचे साधन म्हणून वापरले जाऊ शकत नाही.

या याचिकेत केंद्रीय माहिती आणि प्रसारण मंत्रालय, सेंट्रल बोर्ड ऑफ फिल्म सर्टिफिकेशन, अतिरिक्त सार्वजनिक माहिती महासंचालनालय, दिग्दर्शक आणि सह-निर्माता आदित्य धर तसेच निर्माता जिओ स्टुडिओ यांना प्रतिवादी करण्यात आले आहे.

याचिकेद्वारे मेजर मोहित शर्मा यांच्या कुटुंबाने राष्ट्रीय सुरक्षेबाबतही गंभीर चिंता व्यक्त केली आहे. त्यांच्या पालकांनी असा दावा केला आहे की, चित्रपटात भारतीय सैन्याला पडद्यावर कसे दाखवायचे याचे नियम नियंत्रित करणारी प्रशासकीय संस्था एडीजीपीआयची कोणतीही परवानगी न घेता लढाऊ रणनीती, लष्करी रणनीती आणि लष्कराच्या कारवायांवर प्रकाश टाकण्यात आला आहे.

या सर्व बाबींमुळे मेजर शर्मा यांच्या पालकांनी चित्रपटाच्या प्रदर्शनाला स्थगिती देण्याची विनंती न्यायालयाकडे केली आहे. तसेच कुटुंबातील सदस्यांसाठी चित्रपटाच्या विशेष प्रदर्शनाची व्यवस्था करण्याची विनंती देखील केली आहे. सर्वोच्च न्यायालय येत्या आठवड्यात या प्रकरणाची सुनावणी घेणार आहे.