यशस्वी चित्रपट देणारे दिग्दर्शक संजय जाधव ‘दिल दोस्ती दुनियादारी’ नंतर आता ‘दुहेरी’ ही नवी मालिका घेऊन प्रेक्षकांसमोर येत आहेत. ‘स्टार प्रवाह’ वाहिनीवर सुरू होणारी ‘दुहेरी’ ही नवी मालिका थ्रीलर सस्पेन्स आहे. मैथिली आणि नेहा या दोन बहिणींची कथा या मालिकेत सादर करण्यात आली आहे. दोघी बहिणींच्या आयुष्यात घडणाऱ्या घडामोडींचे नाटय़ मालिकेत सादर करण्यात आले आहे. मैथिली आणि नेहा या दोन भूमिका अनुक्रमे ऊर्मिला निंबाळकर व अमृता पवार करत आहेत. अभिनेते सुनील तावडे हे ‘परसू’च्या भूमिकेद्वारे खलनायक सादर करत असून मालिकेत निवेदिता सराफ, तुषार दळवी, रवींद्र महाजनी आदी कलाकार आहेत. सोमवार ३० मेपासून ‘दुहेरी’ स्टार प्रवाहवरून ही मालिका सुरू झाली असून सोमवार ते शनिवार दररोज रात्री साडेआठ वाजता मालिकेचे प्रसारण होणार आहे.
