Mamta Kulkarni on Ashok Kharat Case: नाशिकच्या सिन्नर तालुक्यातील भोंदूबाबा अशोक खरातच्या प्रकरणात रोज नवनवीन आणि धक्कादायक खुलासे होत असताना आता मनोरंजन क्षेत्रातूनही प्रतिक्रिया उमटू लागल्या आहेत. बॉलिवूडची एकेकाळची अभिनेत्री आणि आता आध्यात्मिक क्षेत्राशी जोडल्या गेलेल्या ममता कुलकर्णीनेही खरात प्रकरणावर भाष्य केले आहे.
अशोक खरातने अनेक महिलांचे लैंगिक शोषण केल्याची माहिती आतापर्यंत समोर आलेली आहे. त्याच्या कार्यालयात लावण्यात आलेल्या छुप्या कॅमेऱ्यात त्याचे काळे धंदे कैद झाले. या लैंगिक शोषणाबद्दल ममता कुलकर्णी यांना टीव्ही ९ वृत्तवाहिनीने प्रश्न विचारला असता त्यांनी म्हटले की, खरात सारख्या माणसाने निष्पाप स्त्रियांवर खूप अत्याचार केला. मी अशा महिलांच्या पतींना आवाहन करेन की, तुम्ही आपल्या पत्नींना सांभाळा.
‘त्या महिलांनाही जाब विचारा’
अभिनेत्री ममता कुलकर्णीने पुढे म्हटले की, खरातच्या अत्याचाराला बळी पडलेल्या महिलांनाही प्रश्न विचारायला हवा. त्या निष्पाप नक्कीच आहेत. पण त्या खरातकडे ज्योतिष पाहायला गेल्या होत्या की इतर कारणासाठी? जर त्याने मर्यादा ओलांडली होती, तर तुम्ही तिथेच त्याला लाथ मारायला हवी होती. मी हात दाखवायला आले आहे, हे करायला नाही, असे ठामपणे सांगायला हवे होते.
तुमच्या अंगाला हात लावला तर तिथेच त्याला एक लावून द्यायला हवी होती. आपण मराठी आहोत. अशा भोंदूंना बळी पडायला नको, असेही अभिनेत्री ममता कुलकर्णी यांनी खडसावून सांगितले.
खरातचे व्हिडीओ व्हायरल कसे झाले?
भोंदू खरातचे व्हिडीओ सोशल मीडियावर कसे व्हायरल झाले? याबद्दल नाशिकचे विद्यमान पोलीस आयुक्त संदीप कर्णिक यांनी माहिती दिली आहे. पोलिसांकडे जे व्हिडीओ होते त्यातील एकही व्हिडीओ बाहेर गेलेला नाही, असे त्यांनी स्पष्ट केले.
खरातच्या ऑफिसमध्ये जो ऑफिसबॉय होता त्याच्या गर्भवती पत्नीचा खरातने विनयभंग केला. त्यावेळी तो खरातच्या विरोधात गेला आणि त्याने स्पाय कॅमेऱ्याने व्हिडीओ चित्रित केले. ते व्हिडीओ त्याने वेगवेगळ्या ठिकाणी ठेवले. कारण खरात त्याच्यावर दबाव आणत होता. त्याला स्वत:ला, त्याच्या बायको आणि मुलांना मारण्याची धमकी त्याने दिली होती.
खरातने धमकी दिल्याने, माझ्या जीवाला काही बरं-वाईट झालं तर आपण हे व्हिडीओ बाहेर आणा असे म्हणून ऑफिस बॉयने वेगवेगळ्या ठिकाणी हे व्हिडीओ ठेवलेले होते, असे कर्णिक यांनी सांगितले. पुढे ज्यांच्याकडे हे वेगवेगळ्या ठिकाणी व्हिडीओ ठेवले होते तेही कदाचित टार्गेटवर आले, आणि त्यांनीही आपल्या जीवाला काही बरं-वाईट झालं तर हे व्हिडीओ बाहेर आणा असे म्हणून इतर दोन-चार ठिकाणी ते ठेवले. जेणेकरून हे प्रकरण दबलं जाणार नाही. मला वाटतं अशातून कुठूनतरी हे व्हिडीओ बाहेर आले आहेत, पोलिसांनी एकही व्हिडीओ ओपन केलेला नाही, असे कर्णिक यांनी स्पष्ट केले.
