बॉलिवूड अभिनेता कुणाल कपूरचा १८ ऑक्टोबर रोजी वाढदिवस होता. त्याने काही मोजक्याच लोकांसोबत ४४वा वाढदिवस साजरा केला. कुणालने आजवर अनेक चित्रपटांमध्ये काम केले आहे. वाढदिवशी सोशल मीडिया पोस्टद्वारे त्याला अनेकांनी शुभेच्छा दिल्या. दरम्यान अभिनेता हृतिक रोशनने दिलेल्या शुभेच्छांनी सर्वांचे लक्ष वेधून घेतले. हृतिकने त्याच्या इन्स्टाग्राम अकाऊंटवर कुणाल कपूरसोबतचा एक फोटो शेअर केला आहे. फोटोमध्ये कुणालने काळ्या रंगाचा टी-शर्ट आणि पोल्का डॉट्स शॉर्ट्स घातली आहे. तर हृतिकने काळ्या रंगाचा हुडी आणि डेनिम शॉर्ट्स परिधान केले आहेत. या फोटोमध्ये ते दोघे हसताना दिसत आहेत. दरम्यान कुणालने घातलेल्या कपड्यांवरुन हृतिकने त्याची खिल्ली उडवली आहे. 'वाढदिवसाच्या शुभेच्छा मित्रा, नेहमी हसत रहा आनंदी रहा, आणि हो ही शॉर्ट्स कृपया फेकून दे' या आशयाचे कॅप्शन हृतिकने दिले असून कुणालची खिल्ली उडवली आहे. असे पहिल्यांदाच झालेले नाही की हृतिकने कुणालची खिल्ली उडवली आहे. गेल्या वर्षी देखील कुणालच्या वाढदिवशी हृतिकने मजेशीर पोस्ट शेअर केली होती. या पोस्टमध्ये त्याने एक जुना फोटो शेअर केला होता. या वर्षी देखील हृतिकने कुणालला मजेशीर पोस्ट शेअर करत शुभेच्छा दिल्या आहेत.
