गेल्या काही दिवसांपासून मराठी आणि हिंदी कलाविश्वातील बऱ्याच कलाकारांच्या लग्नाच्या बातम्या ऐकायला मिळत आहेत. अशाच सेलिब्रिटींच्या यादीतील एक नाव म्हणजे आश्का गोरडिया. विविध मालिकांतून प्रेक्षकांच्या भेटीला आलेली ही अभिनेत्री प्रियकर ब्रेंट गोबलेसोबत शुक्रवारी विवाहबंधनात अडकली. शुक्रवारी ख्रिश्चन पद्धतीने आश्का आणि ब्रेंट विवाहबद्ध झाले. यावेळी टेलिव्हिजनचे बरेच कलाकार उपस्थित होते. आश्काचा जिवलग मित्र आणि अभिनेता करणवीर बोहरा त्याची पत्नी आणि दोन मुलींसह आवर्जून हजर होता. त्याचबरोबर मौनी रॉय, सना खान, अदा खान यांनासुद्धा लग्नसोहळ्यात पाहिलं गेलं. आश्का- ब्रेंटचा रविवारी हिंदू पद्धतीने लग्नसोहळा पार पडणार आहे. त्याआधी शनिवारी म्हणजेच आज मेहंदी आणि संगीताचा कार्यक्रम रंगणार आहे. आश्काच्या अहमदाबादमधील मूळ घरी हा विवाहसोहळा पार पडेल. हिंदू विवाहपद्धतीत आश्का सेलिब्रिटी फॅशन डिझायनर अर्चना कोचरने डिझाईन केलेल्या लेहंग्यामध्ये पाहायला मिळणार आहे. गेल्यावर्षी न्यूयॉर्कमध्ये ब्रेंटच्या घरी ख्रिश्चन पद्धतीने दोघांचा साखरपुडा झाला होता. पण त्यानंतर आश्काच्या नातेवाईकांच्या आणि मित्रमैत्रिणींच्या आग्रहाखातर दोघांनी मुंबईत पारंपरिक पद्धतीने पुन्हा एकदा साखरपुडा केला. आश्काचं हे दुसरं लग्न आहे.
