शशांक खैतान दिग्दर्शित 'धडक' या चित्रपटातून बॉलिवूडला जान्हवी कपूर आणि इशान खट्टर ही नवी जोडी मिळाली. खरंतर या जोडीने बॉलिवूडमध्ये पदार्पण करण्यापूर्वीच चाहत्यांच्या मनात एक स्थान निर्माण केलं होतं. त्यामुळे 'धडक' प्रदर्शित झाल्यानंतर त्याला प्रेक्षकांचा उत्स्फुर्त प्रतिसाद मिळाला. चित्रपटाला मिळालेल्या याच प्रतिसादानंतर हा चित्रपट आता टीव्हीवर झळकण्यास सज्ज झाला आहे. नागराज मंजुळे दिग्दर्शित ‘सैराट’ या चित्रपटाचा हिंदी रिमेक असणाऱ्या ‘धडक’ २० जुलै प्रेक्षकांच्या भेटीला आला आणि बघता बघता लोकप्रिय ठरला. या चित्रपटाने अवघ्या काही दिवसामध्ये जगभरामध्ये १०० कोटींची कमाई केल्याचं पाहायला मिळालं. आतापर्यंत प्रत्येक चित्रपटगृहात प्रदर्शित झालेला हा चित्रपट येत्या ३० सप्टेंबर रोजी टीव्हीवर दाखविण्यात येणार आहे. DHADAK @ShashankKhaitan #Janhvi #Ishaan — Karan Johar (@karanjohar) September 17, 2018 ३० सप्टेंबर रोजी रात्री नऊ वाजता हा चित्रपट झी सिनेमा या वाहिनीवर प्रसारित होणार असल्याची माहिती चित्रपट दिग्दर्शक करण जोहरने त्याच्या ट्विट हॅण्डवरुन दिली आहे. त्यामुळे आता प्रेक्षक या चित्रपटाचा आनंद घरबसल्यादेखील घेऊ शकणार आहेत. दरम्यान, हा चित्रपट नक्की पहा असं आवाहनही करणने यावेळी केलं आहे. 'धडक'मुळे नावारुपाला आलेली जान्हवी ही दिवंगत अभिनेत्री श्रीदेवी यांची मुलगी आहे. जान्हवीने बॉलिवूडमध्ये पदार्पण केल्यापासून तिच्या पदरामध्ये अनेक चित्रपट पडले असून ती करण जोहरच्या आगानी 'तख्त'मध्येही झळकणार असल्याचं सांगण्यात येत आहे.