“मी बुरखाप्रथेच्या विरोधात, पण नितीश कुमारांनी…”, डॉक्टर महिलेचा हिजाब खेचल्याप्रकरणी जावेद अख्तर यांचं मोठं विधान

जावेद अख्तर यांनी एक्सवर पोस्ट शेअर केली असून त्यावर आपली भूमिका मांडली आहे. त्यांच्या म्हणण्यानुसार, हिजाबसारख्या संवेदनशील मुद्द्यावर राजकारण करणे चुकीचे आहे. यामुळे समाजात चुकीचा संदेश जातो. खासकरून पुढाऱ्यांनी याविषयी विचारपूर्वक मत व्यक्त करायला हवे, कारण त्यांच्या बोलण्याचा थेट परिणाम समाजावर होत असतो.

ज्येष्ठ गीतकार जावेद अख्तर म्हणाले, “सर्वांनाच माहीत आहे की, “मी बुरखा प्रथेच्या किती विरोधात आहे. मात्र याचा अर्थ असा नाही की, नितीश कुमार यांनी एका मुस्लीम महिलेचा हिजाब खेचल्याच्या प्रकरणाचा मी स्वीकार करेन. मी सदर प्रकरणाचा निषेध व्यक्त करतो. नितीश कुमार यांनी त्या महिलेची बिनशर्त माफी मागावी.”

प्रकरण काय आहे?

आयुष डॉक्टरांना प्रमाणपत्रांचे वाटप करत असताना मुख्यमंत्री नितीश कुमार यांनी एका मुस्लीम डॉक्टर महिलेने परिधान केलेला हिजाब खेचण्याचा प्रयत्न केला होता. या घटनेचा व्हिडीओ सोशल मीडियावर वेगाने व्हायरल झाला. बिहारमधील प्रमुख विरोधी पक्ष राष्ट्रीय जनता दलाने एक्सवर हा व्हिडीओ शेअर करत नितीश कुमार यांना लक्ष्य केले होते.

मुख्यमंत्री सचिवालयाने १००० आयुष डॉक्टरांना प्रमाणपत्रे वाटपाचा कार्यक्रम आयोजित केला होता. यात प्रतिकात्मक स्वरुपात काही निवडक डॉक्टर्सना खुद्द मुख्यमंत्री नितीश कुमार यांच्या हस्ते प्रमाणपत्रे दिली जाणार होती. त्यानुसार एक महिला डॉक्टर प्रमाणपत्र घेण्यास पुढे आली. यावेळी मुख्यमंत्री नितीश कुमार महिलेला उद्देशून म्हणाले, हे काय आहे? आणि त्यांनी हिजाब दूर करण्याचा प्रयत्न केला.

यानंतर नितीश कुमार यांच्या मागेच उभे असलेले उपमुख्यमंत्री सम्राट चौधरी यांनी त्यांना थांबविण्याचा प्रयत्न केला. तसेच बाजूला उभे असलेल्या अधिकाऱ्यांनीही हस्तक्षेप केला.