ज्येष्ठ अभिनेत्री शबाना आझमी यांच्या कारचा मुंबई-पुणे एक्स्प्रेस हायवेवर अपघात झाला होता. या अपघातात त्या जखमी झाल्या होत्या. परिणामी त्यांना उपचारांसाठी पनवेलच्या एमजीएम रुग्णालयात दाखल करण्यात आले होते. अखेर १४ दिवसांच्या उपचारानंतर शबाना आझमी पूर्णत: बऱ्या झाल्या आहेत. त्यांना आता रुग्णालयातून डिस्चार्ज देण्यात येणार आहे. जावेद अख्तर यांनी नुकत्याच दिलेल्या एका मुलाखतीत शबाना आझमी यांची तब्येत ठणठणीत असल्याचे सांगितले. "शबाना आता पूर्णपणे बऱ्या झालेल्या आहेत. त्यांच्या चाहत्यांनी काळजी करण्याचे कारण नाही. येत्या दोन दिवसांत त्यांना रुग्णालयातून सूटी मिळणार आहे." असे जावेद अख्तर या मुलाखतीत म्हणाले. एक्स्प्रेस वेवर एका ट्रकला मागून शबाना आझमी यांची कार धडकली आणि हा अपघात घडला. कारमध्ये चालक, शबाना आझमी यांच्यासोबत जावेद अख्तरसुद्धा होते. कारचा चालकसुद्धा जखमी झाला होता. तर जावेद अख्तर यांना कोणतीही दुखापत झाली नाही. अपघातात आझमी यांच्या कारचं मोठ्या प्रमाणात नुकसान झालं होतं. शबाना आझमी यांच्या नाक आणि तोंडाला मार लागला होता. दुपारी चार वाजताच्या सुमारास हा अपघात झाला.
