Lata Mangeshkar Passes Away : लतादीदी अनंतात विलीन, शासकीय इतमामात अंत्यसंस्कार

लतादीदींना तिन्ही दलांकडून मानवंदना, भारताचा राष्ट्रीय ध्वज हा मंगेशकर कुटुंबियांकडे सुपूर्द, अंत्यविधींना सुरुवात

सचिन तेंडुलकर, शाहरुख खान, शंकर महादेवन यांनी पुष्पचक्र अर्पण करत वाहिली श्रद्धांजली, लतादीदींना श्रद्धांजली अर्पण करताना सर्वच क्षेत्रातील मान्यवर भावूक

मुख्यमंत्री उद्धव ठाकरे, त्यांच्या पत्नी रश्मी ठाकरे आणि आदित्य ठाकरे यांनीही वाहिली श्रद्धांजली, आदित्य ठाकरे आणि रश्मी ठाकरे यांनी पुष्पहार अर्पण करत वाहिली श्रद्धांजली

पंतप्रधान नरेंद्र मोदी यांनी पुष्पचक्र अर्पण करत वाहिली श्रद्धांजली, पंतप्रधान मोदींकडून मंगेशकर कुटुंबियांचे सांत्वन

पंतप्रधान नरेंद्र मोदी मुंबई विमानतळावर दाखल, काही मिनिटात शिवाजी पार्कमध्ये पोहोचणार

लतादीदी यांचे पार्थिव शिवाजी पार्कवर दाखल

मुख्यमंत्री उद्धव ठाकरे यांचा ताफा शिवाजी पार्क मैदानावर पोहोचला

सचिन तेंडुलकर शिवाजी पार्कवर दाखल

लतादीदींच्या अंत्ययात्रेला सुरुवात

लतादीदींना निरोप देण्यासाठी चाहत्यांची तुफान गर्दी

शिवाजी पार्कच्या मैदानावर होणार अंत्यसंस्कार

संध्याकाळी ६.३० च्या सुमारास होणार अंत्यसंस्कार

नाशिक विद्यापीठाचा 07 फेब्रुवारी 2022 रोजी आयोजित एकविसावा दीक्षान्त समारंभ स्थगित करण्यात आला आहे. भारतरत्न लता मंगेशकर यांच्या निधनामुळे दोन दिवस राष्ट्रीय दुखवटा जाहिर करण्यात आला आहे यामुळे सदर कार्यक्रम पुढे ढकलण्यात आला आहे.

विद्यापीठाचे कुलसचिव डॉ. कालिदास चव्हाण यांनी सांगितले की, विद्यापीठाचा दीक्षांत समारंभ राज्यपाल भगत सिंह कोश्यारी यांच्या अध्यक्षतेखाली सोमवार दि. 07 फेब्रुवारी 2022 रोजी ऑनलाईन पध्दतीने संपन्न होणार होणार होता. राष्ट्रीय दुखवटयामुळे दीक्षांत समारंभाचा कार्यक्रम पुढे ढकलण्यात आला आहे. सदर कार्यक्रमाची पुढील तारीख कळविण्यात येईल असे त्यांनी सांगितले.

स्वतंत्र भारतात जन्मलेल्या प्रत्येकाचे पोषण दोन कारणांनी होत होतं. मातेचे दूध आणि लतादीदींचा सूर. भारतीयांच्या जीवनातला एकही क्षण असा नाही की श्वासांबरोबर सोबतीला लताचा आश्वासक सूर नाही. हा सूर सर्वसामान्यांच्या जगण्यातला सांस्कृतिक विसावा होता. तो तसाच अविनाशी राहील. आकाशगंगेत आता अढळ ध्रुव ताऱ्यांच्या तितकाच अढळ सारथीदार आता विराजमान झाला आहे – ज्येष्ठ नाटककार सतीश आळेकर

भारतरत्न, गानसम्राज्ञी आणि माझ्या गुरु लता मंगशेकर यांच्या निधनाची माहिती समजताच मी बऱ्याच वेळापासून उदास होते. कुणाशीही बोलण्याच्या मनस्थितीत नव्हते. लतादीदींकडून बरेच काही शिकले. मला त्यांच्याकडून खूप प्रेम मिळाले. एकही दिवस असा गेला नाही की मी त्यांचा आवाज ऐकला नाही. त्या माझ्या आयुष्याचा एक हिस्सा होत्या. वयाच्या पंधराव्या वर्षी मला त्यांच्यासोबत बंगाली गाणे गाण्याची संधी मिळाली. त्यांची आठवण म्हणजे मी त्यांच्यासाठी खूप गाणी डब केली. चित्रिकरणासाठी मी गात होते, त्याची कॅसेट लता मंगेशकर यांच्याकडे गेल्यानंतर त्यांच्या आवाजात अंतिम गाणे रेकाॅड होत होते. त्यांच्यासाठी मी खूप गाणी गायली असून माझ्यासाठी गाणे शिकवणारा अनुभव होता. या प्रक्रियेतून मी खूप काही शिकले. दर चित्रपटात मी लताजींबरोबर गाणे गायले. त्यांची सर्वच गाणी आवडती आहेत. त्यात देशभक्तीचे ऐ मेरे वतन के लिऐ बरोबरच अल्लाह तेरो नाम, इश्वर तेरो नाम हे सर्वधर्मसमभावाचे महत्व विषद करणारे त्यांनी गायलेले गाणेही फारच सुंदर आहे. अशा माझ्या आवडत्या व्यक्तीच्या जाण्याने मला खूप दुख झाले आहे. – पाश्वर्गायिका कविता कृष्णमूर्ती

लतादीदी अमर रहे, लतादीदींना अखरेचा निरोप देण्यासाठी चाहत्यांची रस्त्याच्या दुर्तफा गर्दी

भारतरत्न गानसम्राज्ञी लता मंगेशकर यांच्या निधनामुळे दुखवटा म्हणून राज्य सरकारने सोमवार ७ फेब्रुवारी २०२२ रोजी राज्यात सार्वजनिक सुट्टी जाहीर केली आहे.

यासंदर्भात काढण्यात आलेल्या अधिसूचनेत म्हटले आहे की, आज रविवार दि ६ फेब्रुवारी २०२२ रोजी भारतरत्न लता मंगेशकर यांचे दुःखद निधन झाले असून त्यांच्या निधनामुळे संगीत आणि कला विश्वाची अपरिमित हानी झाली आहे. या महान गायिकेला श्रद्धांजली वाहण्यासाठी, परक्राम्य संलेख अधिनियम, १८८१( सन १९८१चाअधिनियम २६ ) च्या कलम २५ खाली महाराष्ट्र शासनास सोपविण्यात आलेल्या अधिकाराचा वापर करून सोमवार दिनांक ७ फेब्रुवारी रोजी राज्यात दुखवटा म्हणून सार्वजनिक सुट्टी जाहीर करण्यात येत आहे. – मुख्यमंत्री उद्धव ठाकरे

लता मंगेशकर यांचे पार्थिव थोड्याच वेळात अंत्यदर्शनासाठी शिवाजी पार्कात नेले जाणार, संध्याकाळी ६ नंतर अंत्यसंस्कार होणार,

पोलीस पथकाकडून मानवंदना देण्यात येणार,

विशेष बँडपथक प्रभूकुंज निवासस्थानी दाखल

लतादिदींच्या जाण्याने आयुष्य खर्या अर्थाने पोरकं झालं आहे. मायेची उब हरवल्याची जाणीव आज होते आहे. गेले काही दिवस त्या आजारी होत्या आणि त्यांच्या निधनाची बातमी आली तेव्हा ते सत्य स्वीकारणं कठीण होतं. परंतु, काही गोष्टी अटळ असतात आणि त्या स्वीकाराव्या लागतात. तसंच लतादिदींचं जाणं आता मनाला स्वीकारावं लागतंय.

आपल्या घरात लहानपणापासून वडिलधार्यांचा सहवास जसा महत्त्वपूर्ण असतो. संगीतक्षेत्रात तेच अमूल्य महत्त्व लतादिदींचे होते. संगीतक्षेत्रातील माऊली सगळ्यांना पोरकं करून गेली. त्यांचं स्थान, योगदान, त्यांची गाणी कायम स्मरणात राहतील. त्या देहरुपातून गेल्या आहेत मात्र, आठवणी आणि गाण्यांमधून त्या सदैव आपल्यात राहतील. त्यांचे स्वर कायम सोबत राहतील, अशा शब्दात गायक आणि संगीतकार राहुल देशपांडे यांनी श्रद्धांजली वाहिली.

पंतप्रधान नरेंद्र मोदी थोड्याच वेळात मुंबईसाठी रवाना होणार

राज ठाकरे त्यांच्या पत्नी आणि आई यांच्यासह प्रभूकुंज निवासस्थानी अंत्यदर्शनासाठी दाखल

भारतीय संघाकडून काळी फित बांधून लतादीदींना श्रद्धांजली

सचिन तेंडुलकर, आदित्य ठाकरे, बाळा नांदगावकर, अनिल देसाई, जावेद अख्तर, अनुपम खेर यांसह दिग्गज व्यक्ती प्रभूकुंज येथे दाखल, पोलीस पथकाकडून पार्थिवाला मानवंदना देण्यात येणार

पंतप्रधानांसह अनेक व्हिआयपी मंडळी उपस्थित राहणार असल्यानं सुरक्षेच्या प्रोटोकॉलमुळे अंत्यविधीच्या कार्यक्रमात बदल,

शिवाजी पार्कमध्येच अंत्यसंस्कार होणार,

सर्वसामान्यांनाही अंत्यदर्शन घेता येणार,

शिवाजी पार्कच्या जिमखाना गेट येथून सर्वसामान्यांना प्रवेश दिला जाणार,

तर उद्यान गणेश येथून व्हीआयपींना प्रवेश

आशुतोष गोवारीकर , जावेद आख्तर, अनुपम खेर यांसह सिनेसृष्टीतील अनेक दिग्गज प्रभुकुंजवर दाखल,

लतादीदी यांचे पार्थिव ब्रीच कँडी रुग्णालयातून प्रभूकुंज या निवासस्थानी अंत्यदर्शनासाठी ठेवले जाणार आहे. साधारण दुपारी १ ते ३ वाजेपर्यंत त्यांचे पार्थिव अंत्यदर्शनासाठी ठेवले जाणार आहे. त्यानंतर शिवाजी पार्कवर त्यांच्यावर अंत्यसंस्कार करण्यात येणार आहे.

जगभरातील कोट्यवधी संगीतप्रेमींच्या कानांना तृप्त करणारे अलौकिक स्वर आज हरपले. लतादीदींच्या आवाजाच्या परीसस्पर्शाने अजरामर झालेल्या गीतांच्या माध्यमातून हा स्वर आता अनंतकाळ आपल्या मनांमध्ये गुंजन करत राहील. गानसम्राज्ञी लता मंगेशकर यांना भावपूर्ण श्रद्धांजली!, असे ट्विट खासदार सुप्रिया सुळे यांनी केले आहे.

गानसम्राज्ञी, भारतरत्न लता मंगशेकर यांचे निधन ही सर्वात दुखद घटना आहे. या संगीतक्षेत्रातील मोठी हानी असून एक पोकळीच निर्माण झाली आहे. स्वरसम्राज्ञी एकच होती आणि एकच राहणार. मी माझ्या मूळ गावी असताना लहानपणी त्यांचे गाणे ऐकत असे आणि पुढे जाऊन त्यांचासोबत गाणे गाण्याची संधीही मिळेल हे मला वाटलेच नव्हते. हे मी माझे भाग्य समजतो. मुंबईला आलो तेव्हा संघर्षाच्या काळात त्यांच्याशी भेट झाली. त्यांची एक आठवण कायम राहिल अशी आहे. त्यांच्यासोबत अनेक स्टेज शो केले. १९९२ मध्ये माझ्या वाढदिवशी बेंगलुरुमध्ये त्यांच्यासोबत गाण्याचा शो होता. समोर लाखो श्रोते होते. तेव्हा लता मंगेशकर यांनी मला भेट म्हणून सोन्याची चैन दिली आणि सर्व श्रोत्यांसमोर प्रिन्स ऑफ सिंगिंग अशी एक उपाधीही दिली. त्यांचे त्यावेळी आशीर्वादही मिळाले व ते कायम राहिले. मी त्यांच्यासोबत २०० गाणी गायली आहेत. डर, दिलवाले दुल्हनिया ले जायेंगे, दुश्मन यासह अनेक चांगल्या चित्रपटात त्यांच्यासोबत गाण्याची संधी मिळाली, अशा शब्दात ज्येष्ठ पार्श्वगायक उदित नारायण यांनी प्रतिक्रिया दिली.