मुंबई: ‘माझ्या नाटकातील सहकलाकारांनी नेहमी कौतुक करतच मला मोठे केलेले आहे. त्यामुळे नकळतपणे मी इथवर पोहोचलो आहे आणि त्यात माझे असे काही वेगळे आहे किंवा मी काही केले आहे, असे मला वाटत नाही. याक्षणी सगळय़ात जास्त आभार मानायचे असतील तर ते मी प्रेक्षकांचे मानीन, कारण तुम्ही प्रेक्षक नसता तर मी नसतो. या नाटकाच्या प्रयोगाला तुम्ही आवर्जून आलात आणि आजही एकही आसन रिकामे नाही. हा एक क्षण मी कायम लक्षात ठेवेन’, अशी भावना ज्येष्ठ अभिनेते अशोक सराफ यांनी व्यक्त केली. अशोक सराफ यांची प्रमुख भूमिका असलेल्या ‘व्हॅक्युम क्लीनर’ या नाटकाच्या खास प्रयोगाचे शनिवारी सकाळी आयोजन करण्यात आले होते. या प्रयोगादरम्यान अशोक सराफ यांचा पंच्याहत्तराव्या वाढदिवसानिमित्त सत्कार करण्यात आला. गेली पन्नास वर्षे आपल्या अभिनयाने प्रेक्षकांची मने जिंकून घेणारे ज्येष्ठ अभिनेते अशोक सराफ यांचा हा सत्कार सोहळा अष्टविनायक नाटय़संस्था व परिवारातर्फे आयोजित करण्यात आला होता. ‘‘प्रेक्षकांच्या प्रतिसादामुळे आजही मला काम करण्याची स्फुर्ती मिळते, उत्साह येतो. जोपर्यंत कलाकार, प्रेक्षक, दिग्दर्शक, निर्माते माझ्या पाठीशी खंबीरपणे उभे आहेत तोपर्यंत मी कोणालाही भीत नाही’’, अशी प्रांजळ भावना यावेळी सराफ यांनी व्यक्त केली. ‘मी बहुरूपी’चे प्रकाशन मुंबई : ज्येष्ठ अभिनेते अशोक सराफ यांच्या पंच्याहत्तरीनिमित्ताने मुलुंडच्या कालिदास नाटय़गृहामध्ये एका खास कार्यक्रमाचे आयोजन करण्यात आले होते. यावेळी अशोक सराफ यांच्या ‘मी बहुरूपी’ या पुस्तकाचे प्रकाशन प्रसिध्द क्रिकेटपटू सुनील गावस्कर यांच्या हस्ते करण्यात आले. राज्याचे अन्न व नागरी पुरवठा मंत्री छगन भुजबळ तसेच चित्रपटसृष्टीतील नामवंतांच्या उपस्थितीत पार पडलेल्या या कार्यक्रमाचे सूत्रसंचलन अभिनेता सुबोध भावे यांनी केले. गावस्कर यांनीही यावेळी अशोक सराफ यांच्याबरोबरच्या लहानपणीपासूनच्या आठवणी जागवल्या. हा दिवस अविस्मरणीय केल्याबद्दल अशोक सराफ यांनी उपस्थितांचे आभार मानले.